【Now Sports】拜仁慕尼黑挾出爐冠軍的氣勢,在周六德甲主場炒慕遜加柏6:0,利雲度夫斯基演出帽子戲法,只差1球便可以追平單季入球紀錄。
由於次席萊比錫同日較早時間以2:3遭多蒙特絕殺,拜仁慕尼黑鬥慕遜加柏前已經鎖定冠軍,紀錄性9連霸。不過,今場對於正追逐單季入球紀錄的射手利雲度夫斯基(Robert Lewandowski)仍重要。
開賽不足2分鐘,羅拔控定傳中再射入,火速助拜仁先開紀錄。前鋒湯馬士梅拿在23分鐘拉開比數。34分鐘,中場甘美治傳到左路,羅拔飛身窩利抽入,拜仁領先至3:0。完半場前,翼鋒高文再數1粒。易邊後戰至66分鐘,中場奈侯斯犯天條,羅拔射入12碼完成帽子戲法,加上翼鋒辛尼埋齋,拜仁向慕遜加柏派足6蛋,慶祝封王。
羅拔連轟3球後,於德甲上陣27場攻入39球,在餘下2場只需要1球,便能夠追平德國名宿「轟炸機」武勒(Gerd Muller)在1971/72賽季創下的單季40球入球紀錄。