法比安斯基派膠。
(©AFP)
【Now Sports】韋斯咸在周六英超有門將法比安斯基兩度犯錯，而且大部份時間10人應戰，雖然勇猛地一度追平，但仍然作客以2:3不敵紐卡素。
韋斯咸首席射手安東尼奧因傷缺陣，由連加特、查洛保雲、科拿斯組成鋒線。紐卡素雙箭頭為辛麥斯文（Allan Saint-Maximin）、祖亞寧頓，阿米朗從後支援。
36分鐘，辛麥斯文射地波，中堅伊沙迪奧普、門將法比安斯基發生誤會，伊沙迪奧普擺老烏，韋斯咸落後之餘，更因為另一中堅格列多遜在辛麥斯文起腳前的犯規，被球證追罰黃牌，兩黃變一紅出場。鎚仔幫黑氣纏身，法比安斯基再次派膠，接角球甩手，祖亞寧頓輕鬆射入空門，紐卡素半場領先2:0。
踢少1人的韋斯咸在下半場大反擊，伊沙迪奧普於73分鐘將功補過，接應傳中頂成1:2。7分鐘後，中堅施倫奇勒在禁區犯天條，VAR判12碼，連加特射入追平2:2。不過，中場祖斯夫韋歷克在82分鐘接應傳中頂入，為紐卡素奠勝3:2。