【Now Sports】經過兩站泰國羽毛球公開賽後,香港隊混雙代表謝影雪已回到香港,正身在酒店隔離21日。「阿雪」表示希望隔離期間盡量保持體能和水準,以迎接3月底的比賽。
提到剛過去的泰國公開賽,謝影雪坦言不太滿意本身表現,「因為對上一個比賽已經係(去年)3月,所以真係隔咗好耐,雖然喺體院封閉嘅時候練得幾好,但始終比起賽場嗰個感覺係唔同,所以第1站開始時,第1場覺得打得唔係好好,但都搵返少少感覺,嗰陣好期待第2場對德國。但之後收到消息,因為佢哋教練個檢測係陽性,體院知道後同羽總、(港協暨)奧委會傾過,覺得對手係密切接觸者,所以就唔建議我哋打。」
謝影雪續謂,「我哋準備咗好多嘢,去泰國又要封閉,又要隔離咗好耐,去到又要每3日撩一次鼻(檢測採樣),所以冇得打個打擊係好大。但因為下一個比賽係接著嗰個禮拜,所以我哋其實可能只可以唔開心一兩日,都好快收拾心情。」
去到第2站第1場,謝影雪與拍檔鄧俊文輕鬆擊敗泰國組合潘保亞柏及歌柏,不過面對韓國拍檔高成炫/嚴惠媛的關鍵一戰,在一度領先下被對手反勝,對於未能在場上發揮,阿雪坦言有點失望,「自己個感覺可能未去到以前比賽狀態,又好想打得好,因為嗰場波好關鍵,贏到就好有機會入總決賽。可能就畀到好大壓力自己,在球場上突然之間空白一片,愈打愈亂,個節奏同埋場上嘅感覺就冇晒。所以唔係話好滿意今次比賽,因為自己準備咗好多,封閉營嘅時候喺體院練得特別辛苦,基本上每日都有兩段練習,星期日都會練,練完但又打唔出個感覺係有啲失望。」
雖然謝影雪目前在香港的酒店隔離,不過她不時在Facebook上載在房間的練習片段,告訴大家就算只能留在酒店房,也希望盡力保持水準。謝影雪說,「因為本身膝頭有傷,喺隔離嘅21日希望盡量保持得好啲,體院都安排咗啞鈴同埋瑜伽蓆,畀我哋喺入面做訓練,希望可以保持返自己嘅體能,因為嚟緊3月尾就已經有第2個比賽,嗰個比賽係計奧運積分,所以好緊要,要盡力保持住自己嘅體能先。」