【Now Sports】前日美國電影評論網站TC Candler又公佈百大最美面孔,男子組基斯坦奴朗拿度包尾:第100位。係唯一現役足球員入選百大,而退役足球員就有型男碧咸,今年排26位。雖然呢個百大榜,大部份人都覺得係得啖笑,但球迷之間都會討論基斯坦奴朗拿度每年都下跌,係咪離開皇家馬德里後已經唔再型仔/靚仔。諗起C朗嘅光頭look,其實佢仲有第100名好可能係同佢嘅名氣有關。
撰文:步大力熊
自從基斯坦奴朗拿度喺2019年尾、2020年頭開始喺社交網站上載女友Georgia幫佢剃光頭之後都一直保持呢個髮型。球迷都係覺得呢個髮型唔適合佢,但又唔明點解以前咁鍾意玩髮型嘅C朗,會剃光頭梳平頭裝。
開頭以為因為C朗仲有美國官司喺身,所以想保持好男人形象,但後來同球迷傾偈,發現原來C朗嘅髮型師Ricardo Marques Ferreira 於2019年11月喺意大利嘅酒店入面俾人捅咗好幾刀身亡,之後C朗嘅頭髮就只有留長同剃光頭。Ricardo 係C朗葡萄牙馬德拉島嘅同鄉,多年嚟C朗嘅髮型都係由佢操刀。C朗好似無公開講過髮型師被殺呢件事。唔知佢係咪未走出傷痛定未搵到另一個合心意嘅髮型師,或者人大咗,又做咗4個小朋友嘅爸爸之後,想要個平實啲嘅髮型。
作為球迷,睇耐咗其實都習慣C朗嘅光頭/平頭裝,最緊要佢踢到好波,因為真係踢一場又睇少一場,所以咩髮型都唔重要。
喺度祝大家新一年順順利利,健康快樂,可以睇多啲好波。
撰文:步大力熊
要做一個理性球迷?不了,成為球迷本身就是一件不理性而且瘋狂的事。
email:ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞:
www.facebook.com/ballthirteen