【Now Sports】前兩集講過外出跑步同地點選擇上有咩要留意,但近日疫情再轉嚴重及最新措施下,我哋又點樣安排平日嘅訓練呢?喺呢度我唔打算介紹咩fitness or S&C 動作畀大家,因為類似video喺呢段期間太多人做,反而大家可以諗吓多咗時間喺屋企,冇理由日日都做fitness,有冇其他choice呢?做fitness嘅話每次做幾耐?一星期可以做幾多次呢?
撰文:劉德龍
其他choice:
跑得步嘅都好明白心肺同下肢力量,係影響運動水平嘅重要因素。少咗落街跑可以試吓一星期跑一次樓梯,跑唔到就可以快行樓梯。每次150至250級X2至4次,行番落去就係休息。邊度跑?咪你屋企大廈嘅樓梯囉。為咗減少同人接觸嘅風險,你可以喺屋企嗰層向下數或者向上數150至250級樓梯,要睇番你住高層定係低層同埋自己嘅體力。向上數嘅跑完就行番落去屋企飲啖水再開始;向下數嘅跑完就可以喺屋企飲啖水,再行返落去再開始,唔好坐升降機。
有幾樣嘢提一提你:
(1)跑前跑後都要各做10至15分鐘熱身及cool down
(2)跑嘅時候唔好用手去捉住扶手,因為好危險。你諗吓當你捉完扶手再抹汗——「完了吧,如無意外。」
(3)唔好坐升降機,因為你跑樓梯嘅時候係唔會戴口罩。如果你跑完坐升降機落番原地又無戴口罩,係一樣會令自己及同一升降機嘅人好擔心。
Fitness or S&C做幾耐?
做呢類運動無論係fitness or HIIT or S&C都好,主要以練肌肉表現為主,當中可以包括力量/速度/耐力/反應/平衡/轉向/制停/發力次序等等。呢類運動係基於你本身嘅能力去progress你嘅進度。吓!你講緊咩呀……是咁的,如果你平時一星期只係做一次運動,我諗15至20分鐘就好夠。如果你平時一星期做到2至3次運動,我諗你可以做30至45分鐘。
另外你最好休息48小時,先再重複同一組肌肉嘅訓練。因為48小時肌肉先夠時間完全修補,咁即係你第一日做手及腹,第二日就可以做腳(樓梯),第三日就可以做返手同腹。唔信嘅你可以試下第一日做腳第二日再跑樓梯,你就會後悔……
有幾樣嘢提一提你:
(1)點先知嗰次練習會唔會太激動?好簡單,做完第二日你發現肌肉好酸痛連綁鞋帶都覺困難,即係代表你嘅肌肉頂唔住,係時候要有恆常運動。唔好等有病先做運動。
(2)運動前後都各再有10至15分鐘熱身及cool down,大部份online video都只係有中間做嗰part,因為熱身同cool down唔吸睛,所以好多時間都唔會拍片。
(3)每晚沖完涼就要foam roller。我哋唔係十八廿二,肌力彈性唔會好似你中學嘅時候咁好。以前做完運動唔cool down第二日都無嘢。冇錯你都識講以前,「舊屎」沖咗落海啦,foam roller 5至10分鐘可以幫你攞番肌肉彈性。
撰文:劉德龍
(鐘意跑步但唔叻)
Q:Actually……who are you?
Ans:Google me
相關文章:
【全體抗疫】基本跑之二(無場篇)
https://sports.now.com/home/other/details?id=28955788774
【全體抗疫】安全「基本」跑
https://sports.now.com/home/other/details?id=28877893794
【編按:全體抗疫,作為體育人更要積極面對疫情,本欄找來本地運動專家與現役運動員,為大家分享疫情下做運動的心得。逢周一及周四上載】