【Now Sports-體育】今年賀歲活動彷彿是全城搶購口罩,個個左撲右撲,𥄫實手機那裡有得賣,但排隊4、5個小時亦未必買得到,基層市民更無奈要硬食炒價口罩。球員可以炒,但同口罩一樣唔蒸得,今季曼聯大部份球員表現唔合格,魔迷自然希望炒晒佢哋。幸好在冬季轉會窗「封關」前,球會趕及簽入盛傳多時的葡萄牙中場般奴費蘭迪斯,令來屆參賽歐聯仍抱有希望。
撰文:盧永義
紅魔領隊蘇B知道魔迷需要啲咩,所以近日公開表明球隊未來要爭取更多入球,而般奴費蘭迪斯來投,首當其衝應該是中場連加特的上陣時間。這名聯賽上陣19場,零入球、零助攻的英格蘭球員,日前在聯賽盃次回合作客曼城時,就因交失波觸怒場邊的蘇斯克查,相信今年夏天被賣走的機會相當高。
儘管般奴費蘭迪斯轉會費最高可達8000萬歐元,令紅魔再度被球迷笑指是「水魚」,但這名士砵亭舊將具備一定能力,有助改善曼聯組織及入球力疲弱問題。簽約5年半的般奴今季為士砵亭上陣28次,貢獻15個入球及14次助攻;對上一季53場比賽更轟入32球,交出18個助攻,數據上非常亮麗,絕對有力成為紅魔新進攻核心。不過當普巴復出後,2人如何分工合作,又是另一問題。
曼聯在聯賽盃4強出局,可以更專注本土聯賽,現時英超排第5,落後第4位的車路士只有6分,仍有機會爭逐來屆歐聯參賽資格。香港時間周日凌晨1:30,曼聯將在主場迎戰同得34分的狼隊,新兵般奴費蘭迪斯有望趕及披甲上陣,球迷不容錯過。
本欄逢星期六上載
作者簡介:盧永義 (102),運動及數字愛好者,熱愛足球,為業餘專欄作家,冀以風趣生動方式分享體育之樂。
電郵:102talksport@gmail.com