【now.com體育】唔係睇低蘇斯克查,默默耕耘娃娃臉,就算唔like都不致反感,但球員時代作為超級後備,今時今日都係後備身份「頂住先」,要坐長帥位……?如果佢得,當日傑斯都得。
撰文:球十三
直到周二晚曼聯官網圖說有意無意「放風」前,相信唔多人估中曼聯會委任蘇斯克查領軍,之後大局已定,大家又開始講佢踢曼聯11季,好熟球會,令人寄予厚望云云。不過挪威人始終只教過曼聯預備組、莫迪同卡迪夫城等球隊,同精英難沾邊,壓場能力唔高。或者,曼聯真正想搵嘅「正選」議價不諧,又或者時候未到,於是又要出呢張「後備」王牌。
所以,就算蘇B喺曼聯有一定江湖地位,要壓住陣中幾個周不時惹麻煩嘅大牌星,太難。如果曼聯係睇長線,曾經發掘過唔少後進嘅蘇B一定啱使,最好順勢沽埋據報有人斟嘅保羅普巴、阿歷斯山齊士,咁遠景就一片光明。但係,怕且以紅魔作風唔似睇到咁長,一定要成績,所以點睇,佢多數真係半季貨仔。
當然話得說回來,強如世界級雲高爾、叱吒球壇嘅摩連奴,以為壓到場啦啩,結果都做唔好,諗到呢度,新生代又未必唔能夠殺出一條血路。「我被界定為攻擊思維,向前傳球、向前奔走,我想進攻。」呢句係蘇B當年執教卡迪夫城所講,相信亦係忍受守勢波多時嘅曼聯躉最欣喜。
暫時應該唔會再見架大巴。
當日鏟草男蘇B,祝你好運。
撰文:球十三
足球迷叫第十二人,冇偏愛,冷眼旁觀係十三。
email:ballthirteen@hotmail.com
歡迎瀏覽球十三fb專頁,若得到波友一個like,就是我們團隊的一大鼓舞:
www.facebook.com/ballthirteen