0
0
【十三短打】曼聯輸成咁排包尾……會有咩震盪?

【十三短打】曼聯輸成咁排包尾……會有咩震盪?

C朗,斬釘截鐵啦。 (©AFP)

【Now Sports】或者唔好彈「咪一X樣」呢個老調啦,開季一敗再敗,30年嚟首次排英超榜尾,仲邊係一樣?低處未算低,大敗所帶嚟嘅震盪,應該好快睇見。

撰文:球十三

曼聯吞賓福特四蛋,睇見迪基亞接連甩轆、基斯坦奴朗拿度沒精打采、班球員一而再簡單橫傳都畀失,仲有倒戈嘅基斯甸艾歷臣近門射歪……講真,十三既非曼躉亦非仇曼,都為呢位曾經張牙舞爪嘅紅魔、橫掃英超嘅王者感到難過、難為情。

本來,鋤強扶弱嘅「弱」,唔應該套用到曼聯,但睇到場波尾段,有少少想佢哋破蛋,點知做唔到,仲差啲輸多粒。一路睇一路諗,曼聯近年唔係未被大炒過,但開季對白禮頓、賓福特連敗,0分入得1球,完場一刻即時排英超榜尾,情何以堪?點算?

算,高層一定會算,震盪難免。炒領隊?未咁快(等埋下仗鬥利物浦再講),但堅要變陣,有啲失信心嘅球員,好似「麥麥送」(哈利麥佳亞)已經淪為笑柄,冇晒信心,就算啲失波未必全部直接關佢事,都入埋佢數啦。

最重要,係會方或者C朗肯定會短期內斬釘截鐵,唔敢再拖拖拉拉。如果C朗想走,今場大敗或者加快佢「跳船」,而如果因為冇人問津(年紀大薪酬高),係咪應該改變諗法或者作出一啲犧牲?簡單講,隊波冇咗定位,坦夏係咪要老奉由佢做重心,絕對左右大局。

另一個可能震盪,係趁轉會市場仲開放撲入去添兵,坦夏賽後都開晒腔話需要「有質素球員」。近代英超最深刻,亦算成功例子,係阿仙奴喺2011/12年開季輸俾曼聯2:8之後,即時班雷霆救「兵」,事實證明梅迪薩卡同阿迪達都係成功收購,嗰季兵工廠由谷底到埋單得第3,唔差㗎。

係變好快啲變,最艱難係曼聯下輪(22號)英超就係主場鬥利物浦,上季曼聯兩循環共吞9蛋,依目前狀況,班波主觀固然想谷底反彈,至怕俾宿敵打落水狗,咁就更難翻身。

撰文:球十三

足球迷叫第十二人,冇偏愛,冷眼旁觀係十三。

  1. 更多
  1. 在內地擁有物業 公屋戶獲發遷出通知書
    在內地擁有物業 公屋戶獲發遷出通知書
    4小時前
  2. 迪士尼魔雪奇幻之旅 融合環保概念
    迪士尼魔雪奇幻之旅 融合環保概念
    10分鐘前
  3. 台灣素食店中毒死者驗出米酵菌酸 毒素全台首見
    台灣素食店中毒死者驗出米酵菌酸 毒素全台首見
    9分鐘前
  4. 東九文化中心「花海」亮燈 不再白茫茫一片
    東九文化中心「花海」亮燈 不再白茫茫一片
    16分鐘前
  5. 國足原主教練李鐵涉貪案一審 李鐵認罪悔罪法庭擇期宣判
    國足原主教練李鐵涉貪案一審 李鐵認罪悔罪法庭擇期宣判
    41分鐘前
  6. 日本進口瓶裝黑醋產品可能含懷疑有問題紅麴成分
    日本進口瓶裝黑醋產品可能含懷疑有問題紅麴成分
    50分鐘前
  7. 小米電動車上市 售價廿多三十萬人民幣
    小米電動車上市 售價廿多三十萬人民幣
    58分鐘前
  8. 《讓子彈飛》原著作者馬識途病逝 享年110歲
    《讓子彈飛》原著作者馬識途病逝 享年110歲
    1小時前
  9. 英王查理斯三世發表錄音講話 強調艱難時刻互相扶持重要性
    英王查理斯三世發表錄音講話 強調艱難時刻互相扶持重要性
    1小時前
  10. 曼谷機場網絡故障 香港快運兩班機延遲起飛
    曼谷機場網絡故障 香港快運兩班機延遲起飛
    1小時前