0
0
【鏟草男女】2021年皇馬足球大事回顧

【鏟草男女】2021年皇馬足球大事回顧

【鏟草男女】2021年皇馬足球大事回顧

【Now Sports】預祝大家新年進步!2021年皇家馬德里都發生咗好多大大小小嘅事。今日同大家傾吓其中對我印象最深刻嘅兩件事,分別就係沙治奧拉莫斯同施丹離隊,因為成件事好峰迴路轉。

撰文:June

拉莫斯離隊

沙治奧拉莫斯隊長深受球迷歡迎,佢防守出色亦有戴刀待衞嘅花名,係球隊嘅關鍵先生,好多時幫球隊絕殺或者扳平都靠佢出色嘅進攻能力,而且佢都好發揮到一個隊長嘅角色,激勵隊員嘅士氣!係皇馬靈魂人物。

好多球迷都希望佢可以續約而且於皇馬退休,可惜佢遲遲未同皇馬簽約,外媒一直傳佢同巴黎聖日耳門洽談中,佢亦曾經表示叫皇馬唔好等佢,唔好將佢放喺下年嘅計劃入面。摩迪續約後,突然收到消息,隊長想續約但可惜皇馬話份合約嘅offer已經到咗deadline冇得續。(我相信啲錢已經用咗嚟簽當時拜仁嘅艾拿巴)。此舉令到一眾球迷,包括唔係好知內情嘅非皇迷,指責皇馬好冇人情味。

當然拉莫斯隊長唔可以喺皇馬退休係好可惜,不過,當華拉尼轉會曼聯,而開季見到拉莫斯因傷喺PSG 都踢唔到幾場,就知感情用事係冇用,皇馬真係需要一個健康嘅後衛。會長應該係做咗正確選擇。

另一件印象深刻嘅,係施丹第二度離職。

2018年基斯坦奴朗拿度走咗後,球隊低迷,施丹被邀回歸,2019/20年即時贏咗西班牙超級盃同西甲聯賽冠軍,大部份球迷都好興奮。而2020/21年球隊依然重建中,球迷同埋高層對施丹領軍方法睇法兩極,西媒仲傳出幾次最後通牒話再唔贏波就炒施丹。球迷投訴施丹用人存偏見,如唔畀機會後生仔,換人都係垃圾時間,死用賓斯馬做正選,同長用中場三寶KCM(卻奧斯、卡斯美路、摩迪)。神奇在,球員喺每次媒體傳出皇馬要炒施丹時,都死拼出好表現,最後歐聯殺入4強, 聯賽亦只係輸俾冠軍兩分,都算有所交代。

完季後,施丹宣佈離職。寫咗一封公開信,信中提及自己係一個皇馬迷,確實,佢無再執教後都至少兩次俾西媒拍到佢同太太到班拿貝睇主場比賽。信中睇到佢對皇迷有不捨之情,因為佢提及感受到球迷對佢嘅愛戴。另外,佢亦指出佢不滿媒體一直發放攻擊佢嘅訊息,同埋表示自己明白高級聯賽嘅遊戲規則,要贏先可以留低。

佢嘅告別信中交代離開原因,係因為覺得球隊需要重建,但佢再感覺唔到管理層嘅信任。佢亦警示各球隊應重新審視唔贏就炒領隊嘅生態,同埋媒體負面新聞炒作風氣,希望佢哋可以更專注講足球。

施丹係咪真係咁差?我絕對唔同意,選人方面,如雲尼素斯、洛迪高同華維迪都係施丹常用嘅後生仔,而老實講安察洛堤依家都一樣用緊賓斯馬同中場三寶,但安帥贏波就當然無咁多球迷或高層投訴,而且安帥換人時間都比較正路,令人覺得其實球員都有機會。

當然大大小小事件仲有以下呢啲:

——歐洲超級聯賽宣佈成立,皇馬及其會長佩雷斯隨即受靶,但最後UEFA被歐洲上訴法院裁定4月對其頒佈嘅禁制令為有效,即不能對參加球隊作出懲罰。

——UEFA歐聯16強因技術問題重抽,皇馬對手由賓菲加變成巴黎聖日耳門。安帥表示強隊遲早都會遇到。

—— 安察洛堤回歸,皇馬暫時15場不敗。

—— 雲尼素斯季初大爆發,據悉係安帥叫古圖奧斯俾前鋒入吓波,提升佢哋信心。

——賓施馬被控勒索國家隊友罪名成立,正上訴中。法國國家隊一反常態,由當初即時唔畀佢踢國家隊,到依家表示會繼續用佢。

——賓施馬爭奪金球獎排第4,史上最高名次。

——年底疫情爆發,多於12名皇馬球員確診。疫情近日變種再蔓延,無論西甲定英超都一路傳出球員確診消息。

希望新一年睇波唔會又再次受影響。喺呢度再預祝大家2022年新年進步,平安,健康,快樂;繼續欣賞好球賽。

撰文:June

旅皇迷一名。喜歡旅行,喜歡足球;享受在場邊搖旗吶喊,經歷足球的喜怒哀樂。

圖片來源 : ©AFP

  1. 更多
  1. 警方周三起灣仔北大範圍封路 會展站周四凌晨起關閉
    警方周三起灣仔北大範圍封路 會展站周四凌晨起關閉
    7小時前
  2. 蘇格蘭明年十月舉行第二次獨立公投
    蘇格蘭明年十月舉行第二次獨立公投
    3小時前
  3. 美國禁止進口俄羅斯黃金
    美國禁止進口俄羅斯黃金
    3小時前
  4. 伊朗申請加入成為金磚國家成員
    伊朗申請加入成為金磚國家成員
    3小時前
  5. 北約峰會於西班牙馬德里召開
    北約峰會於西班牙馬德里召開
    3小時前
  6. 澳門增57宗確診 周三周四再推全民快測違者健康碼將轉「黃碼」
    澳門增57宗確診 周三周四再推全民快測違者健康碼將轉「黃碼」
    3小時前
  7. 【6月28日疫情速報】(23:10)
    【6月28日疫情速報】(23:10)
    3小時前
  8. 澳洲將設國防學校 為太平洋島國部隊提供訓練
    澳洲將設國防學校 為太平洋島國部隊提供訓練
    4小時前
  9. 美國得州貨櫃車內發現數十具非法移民屍體
    美國得州貨櫃車內發現數十具非法移民屍體
    4小時前
  10. 【附連結】41個地方納入強制檢測公告 (6月28日)
    【附連結】41個地方納入強制檢測公告 (6月28日)
    5小時前