0
0
【鏟草男女】炒施丹不如認清問題

【鏟草男女】炒施丹不如認清問題

【鏟草男女】炒施丹不如認清問題

【Now Sports】周中皇家馬德里對薩克達嘅歐聯B組,薩克達因為正選隊伍有10位球員中咗2019新冠病毒,無奈只可以派青年軍上陣。皇馬嘅出場名單上亦作出變動,沙治奧拉莫斯因傷休息連大軍名單都無份;陣容方面,施丹收起長期正選嘅賓斯馬,前場左中右放咗阿辛斯奧、約域同洛迪高;後場用咗踢開左閘嘅文迪踢右閘,而美列度奧就踢中堅位置。都算係新鮮嘅配搭,但可惜唔奏效。

撰文:步大力熊

比賽內容相信大家已經喺四方八面睇到,簡單講,大致上係上半場皇馬行軍速度慢,進攻時回防不及;後防組合可能太新,明顯非常唔夾,常常不在位置;皇馬球員常回傳,只想用兩邊跑到底線斬波,祈求有人喺門前頂入或者射入。反觀被薩克達年輕小將用波,傳波都淡定,而且速度快時時搵到機會快速反擊。上半場以0:3 結束,下半場摩迪同雲尼斯素斯各入一球,可惜都係無法挽回。連補時華維迪嘅最後一擊都俾VAR 駁回,皇馬以2:3落敗。

上半場真係嚇親皇馬球迷,而對最終依然落敗更加非常之嬲。施丹賽後都少有咁唔再耍官腔而直接承認係出現咗問題。「我覺得自己有能力改變呢個情況亦會嘗試。我要負責。上半場真係好差。我有啲嘢冇做啱,但我哋唔會放棄。呢個係一個困難嘅敗仗,一個唔好嘅晚上,但我相信呢隊波。」

有球迷及媒體指星期六國家打吡會決定施丹命運,但如果話要炒施丹,皇馬其實更應該趁呢個機會認清自身問題。

1. 傷患問題

球員比賽時受傷無可避免,但皇馬更應該正視球員訓練時受傷問題。今場施丹用咗慣用左腳嘅文迪踢右閘,明顯令文迪發揮空間有限,而事緣係正選右閘卡華查同埋後備右閘奧迪里奧蘇拿3星期前喺訓練時,前後一日受傷,而夏沙特亦係經過一陣子嘅康復訓練後,當可以上場時,又再次喺團隊訓練受傷,亦一直未有可以再上陣嘅時間表。

球員反覆收傷到底係球員未完全康復,就要接受強度訓練定其他原因,球迷無從考究。而皇馬內部亦無傳出對醫療或者訓練團隊不滿嘅新聞。當然亦有指醫療團隊係因為商業而一直沿用。

2. 球員老化,年輕球員出現斷層

場上有多位3冠功臣係不爭事實,但球員年齡已經唔係兩三年前嘅時候。今場明顯見到馬些路踢得好吃力,間中叉腰喘氣;而平日摩迪夾上卡斯米路同卻奧斯(KMC)更加係會拖慢速度。球場上反應慢半拍就可能錯失一個身位,令欄截唔成功,或者失去控球權。一遇上非常跑得嘅年輕小將,就好容易俾人打反擊,將單刀機會送咗畀對手。

好彩暫時KMC有經驗同技術搭救,但長遠中場只得華維迪一個年輕人亦唔會令速度增加。施丹本來諗住用嚟替摩迪嘅奧迪哥特季初由皇蘇回歸時一直帶傷,今個月踢完國家隊再傷,令人擔心。

前場巴西孖寶及阿辛斯奧間中有好表現,但未算非常穩定。例如巴西孖寶喺應接賓斯馬嘅傳送都未如理想,而佢哋都係未可以穩定咁助攻賓斯馬。約域更加係難有表現,施丹嘗試畀佢上陣,但一係運氣唔夠中柱或越位,又或者唔知點樣協助進攻,有少少等波到嘅情況。

3. 進攻欠多元化

永遠只係見到中場回傳或派波到兩邊,左右閘跑到近底線再傳中。無論傳中或角球,球隊以前有拉莫斯,華拉尼,賓斯馬,基斯坦奴朗拿度同巴爾5個主要搶點,依家少咗兩個,令每場賓斯馬都俾人mark 實,而其他前場中場球員亦冇身高優勢去頂入,要拉莫斯、華拉尼上前幫手,一不小心又可能將反擊或單刀機會送俾人,辛苦兩位左右閘。但唔知咩原因,施丹依然堅持用呢一個戰術而唔去開發下中路進攻。

當然唔係完全無原因,因為行軍速度慢,令對手更容易防守,皇馬打快速反擊嘅攻勢亦已經買少見少。而對手已經跑晒返黎,中路被封,只好又用返兩邊傳中去拉開空間。打用得多就俾人睇穿晒。

4. 防守問題

多年嚟皇馬都係攻強守弱,主要靠歷代龍門去把關,無論卡斯拿斯,基羅拿華斯,及呢兩季神勇嘅古圖都係好優秀嘅龍門。而頭先進攻講嘅兩位中堅跑去幫手頂角球,亦令球隊間中出現俾人快攻時回防唔切嘅情況。

數據顯示,無拉莫斯嘅歐聯比賽,8場有7場都係敗陣,而近兩場歐聯,華拉尼無咗拉莫斯喺旁邊都出現犯錯,可見拉莫斯嘅重要性。相反地,施丹回歸後馬些路正選上陣嘅8場比賽,8場都係敗仗收場。係咁啱定真係有玄機?

相信球隊依家依然係重建階段,今年亦係40年嚟首次無買入球員,但以上問題依然需要球隊同球員一齊正視,講分組賽出線機會言之尚早,但今年皇馬想繼續爭標就要及早求變。

撰文:步大力熊

要做一個理性球迷?不了,成為球迷本身就是一件不理性而且瘋狂的事。

email:ballthirteen@hotmail.com

歡迎瀏覽球十三fb專頁若得到波友一個like就是我們團隊的一大鼓舞:

www.facebook.com/ballthirteen

圖片來源 : ©AFP

  1. 更多
  1. 【晨早新聞重點】(3月9日)
    【晨早新聞重點】(3月9日)
    2小時前
  2. 拜登:全國接種疫苗計劃進展良好
    拜登:全國接種疫苗計劃進展良好
    13分鐘前
  3. 英國新冠疫情持續緩和 約翰遜籲民眾要繼續審慎防疫
    英國新冠疫情持續緩和 約翰遜籲民眾要繼續審慎防疫
    20分鐘前
  4. 聶德權:有否機制剎停接種計劃由專家委員會審視
    聶德權:有否機制剎停接種計劃由專家委員會審視
    26分鐘前
  5. 尖沙咀華源大廈早上約七時解封 未有發現確診個案
    尖沙咀華源大廈早上約七時解封 未有發現確診個案
    27分鐘前
  6. 【招聘啟事】Online News Editor
    【招聘啟事】Online News Editor
    47分鐘前
  7. 英國指CGTN違反廣播條例罰款22.5萬鎊
    英國指CGTN違反廣播條例罰款22.5萬鎊
    1小時前
  8. 緬甸仰光三橋區據報二百名示威學生被圍困
    緬甸仰光三橋區據報二百名示威學生被圍困
    1小時前
  9. 哈里王子和梅根批評英國王室 約翰遜拒絕評論
    哈里王子和梅根批評英國王室 約翰遜拒絕評論
    1小時前
  10. 華源大廈居民出示陰性證明後 可離開尖沙咀受限區域
    華源大廈居民出示陰性證明後 可離開尖沙咀受限區域
    1小時前