0
0
〈娛樂乜乜乜〉港產片有權探討敏感歷史

〈娛樂乜乜乜〉港產片有權探討敏感歷史

〈娛樂乜乜乜〉港產片有權探討敏感歷史

【Now.com娛樂】《中英街1號》得大阪亞洲電影節最優秀作品獎,呢部戲拍攝時已經困難重重,因為講六七暴動,題材相當敏感,所以雖然只係劇情片,申請電影發展基金被拒,跟住連申請去沙頭角拍攝都唔批。當然,申請唔到基金同埋申請唔到禁區拍攝許可,並唔足以指證係政治打壓,即使導演趙崇基聽聞電影發展基金會有人刻意針對呢部戲,但都只係聽番嚟,咬佢唔入。不過究竟有無打壓好快就會揭曉,而家部戲連大獎都攞埋,返到香港如果都仍然搵唔到戲院播,咁大家就知乜事。

我未睇《中英街1號》,亦唔算非常恨睇,因為一向麻麻地好趙導演啲戲,但唔係話佢拍得唔好,只不過電影同人一樣都要講夾唔夾,我只係唔太夾嗰個。但你話想唔想佢喺香港上映呢?咁當然想,唔止想,亦覺得應該要上。一部講六七暴動嘅電影,唔喺香港上,去邊度上?呢個係香港好重要嘅一段歷史,重要到影響香港之後發展,包括香港人對共產黨觀感嘅由來、香港人嘅自我身份認同、對過激社會運動嘅感覺、英國對香港政治同民生嘅正面改革等等,而唔係只單純嘅對與錯。即係如果一個未經歷過六七暴動嘅香港人,佢想為中港矛盾同埋回歸後嘅社會運動尋根,呢段係必然要讀嘅歷史。

而家咁嘅時勢,呢部電影被視為政治不正確亦屬正常,唔講政府吖,我哋講商人,播一部關於社會運動嘅電影已經夠棘手,同文革、菠蘿呢啲扯上關係真係攞佢哋命,當年活躍嘅團體例如工聯會,今日都有頭有面,做生意嘅點會想得罪呢啲人呀?但越係咁,就越應該播。如果連歷史都面對唔到,人仲點樣可以向前行?一段歷史可以有好多面相,趙崇基都只係拍出其中一面,你可以唔同意,可以覺得偏頗,但唔可以阻止佢表達同帶出討論。如果要反擊,你咪發聲囉,拍你自己視角嘅六七暴動電影囉。真理越辯越明,唔畀講、唔畀拍唔代表唔存在,部戲上咗佢自己唔多人睇票房低係一回事,阻止佢上又係另一回事,作為香港人好應該捍衛《中英街1號》上映嘅權利。

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

魯連FB專頁::https://www.facebook.com/lolinhk/
  1. 更多
  1. 周一起台灣抵港人士須酒店檢疫21日
    周一起台灣抵港人士須酒店檢疫21日
    6小時前
  2. 索羅斯大舉買入美國對沖基金Archegos爆倉股票
    索羅斯大舉買入美國對沖基金Archegos爆倉股票
    9分鐘前
  3. 馬斯克暗示Tesla或售所持有的比特幣
    馬斯克暗示Tesla或售所持有的比特幣
    11分鐘前
  4. 王毅不點名批評有國家阻撓緩和以巴局勢
    王毅不點名批評有國家阻撓緩和以巴局勢
    6小時前
  5. 【5月16日疫情速報】(23:40)
    【5月16日疫情速報】(23:40)
    6小時前
  6. 港澳辦指通過公職人員宣誓條例是本港政權建設里程碑
    港澳辦指通過公職人員宣誓條例是本港政權建設里程碑
    7小時前
  7. 澳門新增一宗新冠病毒輸入個案
    澳門新增一宗新冠病毒輸入個案
    7小時前
  8. 遼寧瀋陽再多3宗新冠本土病例
    遼寧瀋陽再多3宗新冠本土病例
    7小時前
  9. 勞工處向五名未有遵從首輪強檢公告外傭發強檢令
    勞工處向五名未有遵從首輪強檢公告外傭發強檢令
    7小時前
  10. 埃及提早開放北部邊境接載加沙傷者入境
    埃及提早開放北部邊境接載加沙傷者入境
    7小時前