0
0
〈娛樂乜乜乜〉人老無所謂 心境老就離晒地

〈娛樂乜乜乜〉人老無所謂 心境老就離晒地

〈娛樂乜乜乜〉人老無所謂 心境老就離晒地

【now.com娛樂】繼續講叱咤,趁仲有感覺。話說今年我最喜愛的歌曲由ToNick《長相廝守》奪得,呢個獎不嬲都係近年叱咤嘅攞分位,有時頒俾當年無可替代嘅song of the year,好似《夕陽無限好》、《酷愛》、《囍帖街》等;或者頒俾一啲有效應嘅歌曲嚟呼應返潮流或者社會,例如《那些年》、《年少無知》、《撐起雨傘》等。《長相廝守》明顯係屬於前者,過去一年聽到呢首歌嘅頻密程度同埋洗腦程度,個人認為只有JW同坤哥首《原來只因深愛著》可以一拼(但奇怪呢首居然五強不入)。

老實,都見到唔少質疑,有傳媒話《長相廝守》爆大冷,雖然睇得出係無乜聽歌又要交稿侷住寫,但都尚算客氣,網上唔少人直頭直呼未聽過,唔止首歌未聽過連ToNick都未聽過。咁其實好難傾落去係嘛?我想反問佢哋其實聽過啲乜呢?如果一個人走出嚟評論年度之歌嘅資格,起碼佢都要經常聽廣東歌先啦。若用正常途徑聽,播吓YouTube聽吓streaming app開吓收音機,佢點可能未聽過《長相廝守》?如果佢日日開無綫就當自己認真聽緊廣東歌,咁算啦就當我唔著。

話自己聽開廣東歌但又完全未聽過ToNick亦都好難講得通,除非完全唔留意新事物而純粹聽上個年代嘅歌,否則人哋出道近十年,雖然叫做係獨立樂隊,但只要正常上吓網都會聽過佢哋嘅作品,因為佢哋成日都唱啲所謂網歌,即是呼應網絡文化或者翻唱討論區改詞作品,仲幾受歡迎。寫關心妍攞錯獎嘅《關心菊英》未聽過?關心妍自己都唱過喎!黃子華名句《你對我已經唔係好似以前咁》未聽過?講朋友借錢唔還,超過200萬點擊率嘅《Last Christmas》未聽過?ViuTV《回憶備份》有無睇?主題曲ToNick唱喎,未聽過?《長相廝守》唔止903,TVB都攞過冠軍歌㗎,勁歌都佔一首㗎,又未聽過?佢哋由蒲吧一路唱到上九展,香港每逢有音樂節,只要請本地單位嘅,都幾乎會見到佢哋,未遇到過?咁請問平時聽開啲乜呢?

其實都唔緊要,若可以虛心啲唔好見新嘢就踩,未聽就話一蟹不如一蟹,都可以好來好去,因為講到底,呢個只係一種老嘅表現。係啊睇清楚,你老喇!人人都會老,年紀老無所謂因為無得避,但心境老就會離地,乜都係以前好,咁其實你攞返以前啲CD同錄音帶出嚟自閉聽咪得,仲睇乜嘢而家嗰啲在你眼中不知所謂嘅頒獎禮?咪浪費心機,理得啲細路聽咩呢?反正嚟緊幾十年你都係睇唔順眼㗎啦。

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

  1. 更多
  1. 蔡玉玲被控虛假陳述罪成 首宗有記者因查冊被定罪案件
    蔡玉玲被控虛假陳述罪成 首宗有記者因查冊被定罪案件
    9小時前
  2. Tap&Go:消費券計劃期間使用香港電訊收款機會豁免交易費
    Tap&Go:消費券計劃期間使用香港電訊收款機會豁免交易費
    5小時前
  3. 商經局:港府與新加坡商討重啟旅遊氣泡已達成熟階段
    商經局:港府與新加坡商討重啟旅遊氣泡已達成熟階段
    5小時前
  4. 科學委員會:已打兩劑疫苗人士列緊密接觸可縮短檢疫期
    科學委員會:已打兩劑疫苗人士列緊密接觸可縮短檢疫期
    5小時前
  5. 八人接種疫苗後不適送院 兩人留院觀察
    八人接種疫苗後不適送院 兩人留院觀察
    5小時前
  6. 【附名單】7個地方納入強制檢測公告
    【附名單】7個地方納入強制檢測公告
    5小時前
  7. 【4月22日疫情速報】(23:20)
    【4月22日疫情速報】(23:20)
    6小時前
  8. 習近平承諾中國2030年前逐步減少消耗煤
    習近平承諾中國2030年前逐步減少消耗煤
    6小時前
  9. 【持續更新】新型冠狀病毒疫苗接種資訊
    【持續更新】新型冠狀病毒疫苗接種資訊
    6小時前
  10. 拜登承諾美國會在2030年前減少一半溫室氣體排放
    拜登承諾美國會在2030年前減少一半溫室氣體排放
    7小時前