豬肉檔阿威IG、Youtube一日吸幾千粉絲：祝各位520快樂

荃灣新村街豬肉檔店長阿威，因為外表似羅志祥、Anson Kong而爆紅，好多家庭主婦專誠去搵阿威買豬肉合照，讚佢為人有禮貌，樂意向街坊分享煲湯心得。除咗檔口生意大增，阿威亦獲傳媒、品牌邀請合作，得到唔少工作機會，噚日佢仲開埋官方社交平台同YouTube頻道，睇嚟會進一步進軍幕前。

相關消息：荃灣豬肉檔阿威粉絲團破萬　「威威豬」參考「鏡粉」搞生日應援？

阿威今年36歲，全名劉宋威（Samuel），雖然阿威透露自己已婚，育有一對仔女，但依然深受女士歡迎，由粉絲開嘅「荃灣鮮肉威威應援團」Facebook群組有超過1.4萬成員。阿威近日接受多間傳媒訪問，仲受到運動品牌邀請試著工作波鞋，拍攝一系列豬肉檔廣告相，認真威威！

Photo／FB@SKECHERS

噚日（19日）傍晚阿威正式開設官方IG、Facebook同YouTube頻道，簡介上寫住「熱愛下廚，分享生活」。佢亦拍咗條片打聲招呼，叫粉絲多啲留意佢嘅平台，「大家好，我係阿威，劉宋威！呢度係分享我嘅煮食心得同日常生活，多謝大家一直支持我。」目前阿威IG已有近8千Followers，Facebook有5300多人讚好，YouTube就有2790個訂閱。