0
0
〈豬事八卦〉收工好危險-寶豬姑娘

〈豬事八卦〉收工好危險-寶豬姑娘

【Now.com生活】有晚我哋收工鎖門後,行咗一段路~
有位女士迎面行埋嚟,佢邊揮手邊大嗌:「姑娘!」
我平時戴住口罩你咁都認到我?
我哋點點頭繼續行,正當要擦身而過時…

女士捉住我同事手臂:「去邊呀你?」
收工返屋企囉粉餅,唔通上你屋企呀?
同事即刻揈開佢隻手行前兩步:「收工食飯囉」
女士一臉詫異,詫你個屁?

我即刻拖住同事細細聲急急腳走:「唔好望唔好望返轉頭,走呀走呀」
女士快步追上:「我要睇醫生喎」
明天請早啦。

我:「我哋收咗工㗎啦」
女士:「醫生都係呀?」
我:「係呀,診所落埋閘㗎啦」
女士:「我遲咗少少啫」
爭幾吋就爭幾吋,爭幾分就爭幾分。

我:「收咗工㗎啦,聽日呀,聽日嚟睇呀」
女士一手捉住我半碌手臂,我:「啋!」
女士:「唔係呢,我想而家睇呀」
我:「我哋埋晒數落晒閘㗎啦,醫生已經喺公路上奔馳緊返屋企㗎啦,你聽日再嚟睇啦」
女士:「埋晒數?埋晒數唔可以睇㗎啦?」
我:「無㗎啦,埋晒數即刻已經計好晒數,總結咗全日嘅數,聽日又新嘅一日㗎啦,你聽日嚟睇啦」
女士終於停低,我哋繼續急急腳走。

女士在空氣中大嗌:「你唔收我錢咪唔駛計數囉!咪有得睇囉!」

我同同事對一對過眼神,再加快腳步…
醫生,我想申請一條隧道可以同人零接觸咁安全離開診所範圍呀!或者全診所密封式唔駛露樣對客呀?

文:寶豬姑娘
(中女珍寶豬,任職診所助護超過十年,經常使用逆向思維參透世事,包括⋯⋯細閱大家姐。)

〈豬事八卦〉逢周三刊登
專欄屬作者個人意見,不代表本網立場

寶豬姑娘FB專頁::“https:/www.facebook.com/jumbopig14/"
  1. 更多
  1. 立法會首讀及二讀國歌條例草案
    1小時前
  2. Netflix藉奧斯卡吸納新用戶
    6分鐘前
  3. 三間發鈔銀行提供新鈔兌換服務
    11分鐘前
  4. 公院醫生團體及陳沛然周六舉辦申訴大會
    19分鐘前
  5. 藥劑師:噴鼻式流感疫苗適合幼童接種
    21分鐘前
  6. 串流平台、超級英雄進軍奧斯卡
    23分鐘前
  7. 英議員將提修訂案杜絕「硬脫歐」
    38分鐘前
  8. 政府強烈譴責眾志政總掛示威標語抗議國歌法
    1小時前
  9. 警方落馬洲檢一噸煙花爆竹約值二百萬元
    1小時前
  10. 政黨批政府派四千元申請手續繁複擾民
    2小時前