0
0
〈豬事八卦〉飲啖水-寶豬姑娘

〈豬事八卦〉飲啖水-寶豬姑娘

【Now.com生活】有日診所好得閒~得閒到我喺度睇劇…
有位先生推門入嚟診所,佢慢慢行埋嚟登記處。
我:「係咪睇醫生?麻煩你畀身分證明文件我登記啊」
佢:「啊?啊?好呀,係咪可以餵佢飲啖水呀?」
佢?邊個佢呀?我見到嘅係得你一個咋喎。

我:「你想飲水呀?嗰邊有部水機呀,側邊有杯啊」
佢:「唔係我飲呀」
喂,大佬,日光日白你唔好嚇我呀,我見唔到其他人喎!
我好驚呀:「…咁邊個飲呀?」
佢:「佢囉」
我:「唔好意思呀先生,呢度除咗你,我見唔到有其他人啦」
佢靜咗靜,之後講:「你梗係見唔到啦,佢都唔係人」
呀!!!!媽呀!!!!捉鬼天師幾號電話呀?999幾號電話呀?
我無出聲,嚇到呆咗。

佢應該見我面都青埋:「你做咩呀?我又唔係叫你餵,我搵醫生咋嘛,我知唔關你事呀」
冤有頭債有主呀~

我吞吞口水:「咁你哋要搵醫生呀?」
佢:「咩嘢你哋呀?我一個人嚟咋喎」
我:「咩呀…你頭先唔係話仲有個『佢』㗎咩?不過唔係人呀嘛?」
佢:「你都痴線,佢梗係唔係人啦!我講緊我下面嗰舊屎呀!」
我:「……又話飲啖水?」
佢:「係呀!佢塞咗喺度好多日,我上網睇話塞住個原因係佢啲水份被吸收晒,所以先好難出嚟,咁我嚟睇醫生囉,我唔敢自己亂嚟呀,梗係搵醫生做啦,畀返啲水佢,佢飲夠咪會出嚟囉」

….你痴得嚟又好似痴唔晒喎,下次講嘢唔好講到咁隱晦啦!人嚇人無藥醫㗎!

 

文:寶豬姑娘
(中女珍寶豬,任職診所助護超過十年,經常使用逆向思維參透世事,包括⋯⋯細閱大家姐。)

〈豬事八卦〉逢周三刊登
專欄屬作者個人意見,不代表本網立場

寶豬姑娘FB專頁::“https:/www.facebook.com/jumbopig14/"
  1. 更多
  1. 唐英年表示不希望林鄭月娥辭職
    9分鐘前
  2. 港大民研:林鄭民望評分創歷任特首新低
    1小時前
  3. 陳健波:不會休會前審議明日大嶼研究撥款
    1小時前
  4. 【新聞智庫】中美貿易成新冷戰?
    1小時前
  5. 盧偉聰承諾嚴肅跟進示威者違法行為
    1小時前
  6. 林正財:監警會是較快捷方法處理612投訴
    2小時前
  7. 【即日焦點】港大民研:林鄭民望創歷任特首新低;中資銀行涉違北韓制裁令或被美國終止美元業務
    2小時前
  8. 港大民研:林鄭民望評分創歷任特首新低
    2小時前
  9. 青衣美景花園高處墮鐵架擊斃女途人
    3小時前
  10. 上訴庭質疑警如何得知上鎖手機資料有助檢控
    3小時前