【Now.com生活】「Hangry」一詞年初加入牛津英語字典，將「Hungry」及「Angry」混合，解作「餓到嬲」。但點解會Hangry？唔通人一餓就會燥底？
美國研究人員發現，人類唔係單純因為肚餓而嬲，而係飢餓感會加劇負面情緒，例如憤怒、壓力、厭惡等。
根據期刊《Emotion》，研究團隊把受訪者分成飢餓組同飽肚組，兩批受訪者一齊睇帶小狗、燈膽同蛇的圖片，分別代表正面、中性、負面情緒。結果發現飢餓組嘅受訪者比飽肚嘅人，對負面情緒圖片有較大反應。
在另一項測試，研究團隊要求受訪用電腦回答問題，正當快將完成之際，安排電腦突然死機，研究人員會怪罪受訪者，問佢哋㩒錯咩制搞成咁。面對被屈，飢餓組同飽肚組嘅受訪者都感到不滿。不過飢餓組於測驗檢討時表現得更生氣、不憤，帶有更多憤怒情緒。
所以，單單飢餓不足以令人嬲！只係肚餓嘅人處於某種負面環境刺激或遇到負面衝擊先會咁Hangry！Hangry呢條算式從此要變成 「Hungry＋negative impulse + angry = Hangry」 啦！
