【now.com】由往年起,流感疫苗好貼心咁畀咗兩款大家選擇。
一款係三價,一款係四價⋯⋯兩者嘅分別只係四價比三價多咗一種乙型流感嘅保護。
基於普通市民都唔會理唔會識唔會自己去了解三價同四價有乜分別,所以成日都會有好好好多誤會發生。
有日就有一個姨姨帶住位工人姐姐嚟到,
姨姨:「我想同佢(工人姐姐)打流感針㗎!」
我:「好呀,麻煩身分證登記呀,今年有三價同四價嘅流感疫苗,請問你係想同佢打邊一種呢?」
姨姨:「有冇一價嗰啲呀?」
玩嘢呀?咁都講價?
我:「冇啊,得三價同四價,四價係多一種乙型流感嘅保護。」
姨姨:「佢唔駛咁多保護㗎啦,你同佢打少少得㗎啦!」
點打少少⋯⋯個針頭入啲唔入啲,射啲唔射啲咁嗎?
工人姐姐開聲了:「我想要好啲嘅!」
姨姨:「打咁好做乜呀?你知唔知一嚟就打咁好,好易打瓜你㗎!到時有乜事,冇得醫㗎!」
⋯⋯你講緊乜啊?點解你講到吸毒咁嘅?
工人姐姐怕怕:「我唔打啦。」
姨姨教路:「打少少就唔怕嘅。」
姨姨問我:「邊隻最平呀?」
我:「⋯⋯三價」
姨姨:「真係冇一價打㗎?你有四價又有三價,冇可能冇一價㗎喎?你唔好呃我喎。」
我:「我冇你呃你啦⋯⋯」
姨姨:「以前都有㗎,以前邊有啲乜嘢三價又四價啫,你畀返以前嗰隻我得啦,佢唔駛要咁好㗎。」
我:「以前嗰隻即係𠵱家嘅三價。」
姨姨:「哎,都唔知你係咪路㗎,又唔知你係咪新嚟唔識嘢,你是但同佢打枝最平㗎啦,唔好嘥我時間啦!」
我:「咁同佢登記打枝三價啦。」
姨姨:「你有一價就打一價啦,冇咩?」
冇呀!冇呀!冇呀!我唔同你玩啦!
文:寶豬姑娘
(中女珍寶豬,任職診所助護超過十年,經常使用逆向思維參透世事,包括⋯細閱大家姐。
FB: https://www.facebook.com/jumbopig14
〈豬事八卦〉逢周三刊登
專欄屬作者個人意見,不代表本網立場。