【now.com娛樂】又過咗一年六四，今年第廿八年，一如以往，除咗悼念集會，係冇事發生嘅，唔會有個人走出嚟道歉囉，絕對唔會。口號一直嗌，都只得維園裡面嘅人先聽到，人數又越來越少。唔敢講六四嘅照舊唔敢，好似吳彤寫首關於六四嘅歌，都搵唔到人幫佢拍MV。關於六四嘅資訊照例被河蟹，連愛國歌手李克勤都走出嚟問微博點解Post唔到相，可笑復可悲。不過點講都廿八年喇，本來好多嘢都已睇化，惟獨今年好心酸嘅係，我哋嘅下一代，讀緊大學嘅學生話，覺得悼念冇意義，六四唔關香港人事云云。
對於廿八年前在電視機面前經歷過六四嘅人，呢個講法絕對係傷透人心。其實點解一個集會可以延續廿八年？就係想更多人記得、想更多人知道，呢個就係集會嘅Function。唔通真係天真到以為十幾萬人坐在維園點蠟燭，就會有人良心發現然後承認歷史咩？你都知香港人幾善忘㗎啦，今年唔講，出年唔講，就冇咗件事。到十年八年後有人提番，就已經成為一件遙遠嘅往事。
經歷過嘅人尚且會忘記，未經歷過嘅人，即是年輕人，就更加怕佢哋唔知道。多年嚟我哋呢一代，最怕就係下一代唔知，或唔理呢件事，而今年學生嘅聲明，就正正話畀我哋知呢個已成事實，都算得上係驚心動魄。個後果係乜呢？冇錯，對香港人嚟講，係冇乜特別後果嘅，但對於掌權者，佢哋就成功用時間去沖淡人嘅記憶。一啲佢哋本來應該要面對嘅歷史，而家唔需要喇，更毋需為做過嘅事付出任何代價。佢哋就係想人淡忘，點解李克勤Post唔到圖？點解吳彤冇人敢幫佢拍MV？就係咁解。
?家下一代同你講佢哋唔想記得，正正就讓政權將歷史抹殺得一乾二淨。佢仲怕我哋呢班老嘢做乜呢？下一代都話唔理喇，等我哋一個二個入土為安，六四就唔再存在於時間之中。廿八年嘅堅持，原來係一場空，?家心入面，就係充斥住呢種悲痛嘅感覺。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場。
