【Now新聞台】英格蘭超級足球聯賽，阿仙奴主場2比0擊敗白禮頓，取得今季第四場勝仗。
拉卡錫迪爭取為阿仙奴開季前四個主場都有入球，但開賽不足兩分鐘，門柱壞他好事。
兵工廠相隔34年再與白禮頓在聯賽碰頭，他們初段的攻勢令白禮頓沒有喘氣時間，連環施射都被擋，最後由蒙維爾一控一抽入網，16分鐘阿仙奴領先，亦是這位西班牙後衛相隔超過四年半來首個英超入球。
白禮頓之後有扳平機會，但馬治的勁射中柱彈出，施治多得好朋友的幫忙保着不失球，但領先一球不太穩陣，阿仙奴完半場前有一次反擊機會，一堆人向着白禮頓禁區狂奔後，藍斯的撞射過不到馬菲賴恩隻腳。
比數到56分鐘被改寫，阿歷斯山齊士後腳傳送，接應的伊禾比順勢抽入，阿仙奴領先2比0，山齊士騙過白禮頓球員，他這次巧妙傳送做就伊禾比攻入他今季第一個聯賽入球。
之後山齊士都想開齋，但給登克僅僅護空門，阿仙奴最後贏2比0，在所有賽事錄得七場不敗，領隊雲加1996年10月上任，這場勝仗慶祝他執教兵工廠21周年。
另一場，古天奴離門廿幾碼的世界波，29分鐘帶領利物浦領先紐卡素，但紅軍之後一次不為意被追平，兩位中堅路夫蘭及祖馬迪走掉了荷西路，給他射過出迎的米奴列，36分鐘替紐卡素在主場追成1比1，利物浦在所有賽事近七場只取得一勝 。
