【Viu】宣萱今日出席商場活動，吸引大批Fans捧場，仲獲小妹妹Fans捉手仔讚好滑！席間，宣萱獲贈著名畫家徐悲鴻嘅畫作，雖然價值不菲，但佢話自己一向唔會賣禮物套現，所以屋企好多珍藏。至於藝術品，宣萱就話冇乜天份，唔識收藏，反而最想買超級英雄人物嘅雕像，仲高呼想去古天樂個玩具倉參觀添，咁算唔算公開爭取呢？！
自認與馬有緣嘅宣萱，除咗屋企佈滿風水陣外，又大方分享「氹馬秘技」，原來同「雞髀打人牙骹軟」嘅道理一樣，最緊要準備食物，所以當年成日拍古裝劇騎馬都冇出過事，反而喺南非拍旅遊節目時，目擊過拍檔紀曉華被拋落地。
講到曾合作嘅胡定欣今日宣佈離巢回復自由身，宣萱都好驚訝，但對方冇搵過自己搭路入古生公司，亦相信定欣一定有好路數嘅！對於早排受訪時自爆當年因為不滿「擦鞋文化」而離巢，宣萱繼續「有嗰句講嗰句」，仲憶述當年見過最誇張嘅事係送蛋糕幫高層賀壽，好彩古生公司唔興呢啲嘢咋！雖然唔興幫老闆賀壽，但宣萱都秒回古生嘅生日日期，仲親解呢對「黃金CP」撻唔著之謎！想知就睇足本訪問啦！
