【Viu】譚耀文入行37年，今晚終於喺麥花臣舉行處男個唱《譚耀文In Full CHARACTER 演唱會》，獲老婆Fiona、愛女譚津如現身撐場！演唱會甫開始，身穿黑西裝嘅阿譚，率領一眾同樣着素服嘅表演嘉賓與樂手現身台前，一字排開為大埔宏福苑火災慘劇默哀，之後阿譚清唱英文歌《What The World Needs Now》送暖！
其後阿譚換上銀色bling bling歌衫唱出道作《為你解悶》，最後仲唱到瞓晒地添，好投入好落力！阿譚感觸表示努力咗37年先有呢個演唱會，並親解揀唱《為你解悶》做第一首歌背後嘅故事，好勵志呀！
阿譚表示今次準備咗好多fans鍾意嘅歌，就好似經典金曲《長夜怨曲》！去到個唱尾聲，18歲大仔Daniel譚皓哲透過片段撐爸爸，而14歲餅印細女Tamia譚津如更帶埋大提琴驚喜上台，為阿譚伴奏《烽火情天》獲全場拍手叫好！
Tamia怕醜打招呼後，被爸爸即場嚴刑拷問有冇男朋友，Tamia點答？離場前，呢位前世情人仲錫咗阿譚面豬登一啖，阿譚冧到爆呀！
唱到《悠長假期》嗰陣，阿譚即興落台同fans握手！是夜多位圈中好友做觀眾支持，包括黎姿細佬黎嬰、Locker林家熙、翁子光導演、胡楓、肥媽、連炎輝、胡鴻鈞、米雪、伍仲衡同老婆、譚玉瑛、湯寶如等，快啲睇實況片！
