【Viu】兩位「星二代」Ashley林愷鈴同Chris湯君耀，早前為銀行信用卡拍廣告，呢日就孖住出席活動，兩位自稱都係慳家之人，買嘢又會精打細算，所以未試過亦冇可能會碌爆卡。講到今次係佢哋第一次合作，雙方即刻互笠高帽讚對方專業。
即將大學畢業嘅Ashley近日分別完成咗電影《七人樂隊》同電視劇《死角》嘅拍攝，提起喺《死》同MIRROR成員AK對戲，佢直言每次同MIRROR合作都好驚喜，仲欣賞到成為鏡粉：「好多時偶像畀人有刻板印象，但同過佢哋合作就知道佢哋係非常勤力，為打戲不停操練、節食。」有冇趁機問AK有冇演唱會飛先？佢笑話冇，知道一票難求就更唔想麻煩到對方。至於Chris疫下孖生哥哥湯君慈夾資開凍肉店，佢報喜指生意尚算唔錯，差唔多回本，不過暫時未諗住開分店。
