經常被「野生捕獲」嘅影帝周潤發(發哥)出名貼地無架子,每次有人求合照佢都大方應承。噚日演員陳家樂就分享自己偶遇發哥經過,仲好興奮咁話「開心過中六合彩」。
喺網上不時見到有人分享同發哥嘅合照,幾乎每次都係發哥揸機,仲鬼咁好笑口,隔住個 Mon 都感受佢有幾 Nice。今次「捕獲」發哥嘅幸運兒就係陳家樂,佢話自己食燒鵝嗰時,後面有班行山客嗌嘢食,侍應開口就問「發哥,想食咩?」家樂即刻估到身後嘅人就係周潤發,笑稱「我計算到,佢係賭神發哥既(嘅)機會率一定大過同花順!我諗都唔諗,轉頭一望!果然!係偶像發哥。入行咁耐!我終於可以見到發哥啦!」
見到偶像嘅家樂指「開心過中六合彩」,又膽粗粗問可唔可以合照,但因為家樂電話鏡頭花咗,張相影到矇查查,發哥見到之後就用自己電話補影多張,再 Send 返畀家樂,真係親切到爆!有網友就「錯重點」話發哥影嗰張相清好多,啲色又靚,紛紛問發哥用咩型號電話。