【Now.com娛樂】有時真係唔想人哋講句嘢就插落去，但有啲說話真係好難忍受。睇到黃百鳴話對明年賀歲片有信心，已經打個突，但尚且可以理解係客套話。咁你開戲，唔通人哋問起你話冇信心，死梗咩？咁不如唔好開啦！正如啲演唱會未取消之前都實話有信心㗎，冇信心咁退票啦。
佢解釋點解有信心嗰句攞命，佢話而家社會氣氛咁樣，農曆年大家會想睇啲開心嘢。生意佬諗嘢真係好可怕，離地生意佬係十倍可怕。
大家都係香港人，呢半年嚟，幾時真係開心過？係尋日，係區議會大勝，大家終於露出久違嘅，發自內心嘅笑容，一日咁多。如果你套賀歲片尋日上，咁可能會執到啲票房嘅，但農曆年咩景況？林鄭都答唔到你。
最重要係，香港人唔係唔開心咁簡單，係嚴重嘅憂慮。五個幾月，死嘅死，傷嘅傷，想爭取嘅五大訴求，一個都未爭取到，區議會都講明咗民意喺邊，市民都犧牲晒應有嘅生活便利同埋健康、積蓄、情緒，幾乎所有正常嘅生活，但仍然只係得到一日稍微嘅安慰。然後你話，咁嘅社會氣氛幫到你部戲，呢幾個月，你係咪入咗平行時空？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
