0
0
〈娛樂乜乜乜〉賺錢其實唔係包埋被欺凌

〈娛樂乜乜乜〉賺錢其實唔係包埋被欺凌

【Now.com娛樂】外國有三個新晉女星,不約而同刪除咗自己嘅社交網站,包括《星球大戰》第7、8集嘅Daisy Ridley,《星球大戰》第8集嘅Kelly Marie Tran,同埋《Stranger Things》嘅Millie Bobby Brown。原因幾乎一樣,同樣係頂唔住網絡欺凌。

藝人被網上欺凌唔係新鮮事,自從網絡變質開始(而我其實唔知幾時,記得初初有得上網時大家都好有禮貌嘅),對娛樂圈公眾人物嘅網絡欺凌就越來越嚴重,全世界都係咁。以香港為例,其實藝人開自己嘅社交網絡,面對緊乜嘢呢?首先就係一個食得鹹魚抵得渴嘅思維先啦,點解當初要開account?因為係免費又有效嘅宣傳,同時藝人又開始嫌棄傳統媒體生安白造,覺得既然凡事可以自己交代,點解要畀人屈?所以藝人基本上無乜需要考慮,已經有好大誘因去跟隨大潮流。但世界上邊有咁完美仲要免費嘅嘢?得到好處自然有相對嘅豬頭骨要啃,係睇你食道大定係嚿豬頭骨大啫,但香港普遍都好捱得,啃住唔上唔落都照忍。

做得藝人,通常都介意人哋睇法,梗係鍾意人讚,幻想中有自己地盤,好似去fan club聚會咁同fans有傾有講,呢種諗法嘅人最慘,因為現實落差大到難以接受。現實係你有幾多人鍾意就有幾多人討厭,而鍾意你嘅人通常少發言,討厭你嘅人反而咬住唔放,其實呢個係人性,讚美說話本身係難講啲㗎,鬧人流暢好多仲可以順便發洩情緒。於是乎,藝人每發表一個言論,總係受到批評多,認同少,呢個係EQ大考驗,情況就如同上台唱歌但台下噓到你爆,點消化呢?面皮薄嘅會好困擾,甚至引發情緒病;硬淨嘅會撐到底,慢慢將批評人哋嘅批評發展成一種興趣;天生唔太上心嘅比較幸福,可以輕鬆同負評共存,你有你鬧我有我瞓覺;對環境轉變適應力強嘅,就反過嚟利用呢啲批評成為助力,負面宣傳都係宣傳,呢種人最聰明。

但大部分人都係面皮薄嗰種,承受困擾本身已經痛苦,你開得個account總唔可以唔理,都要管理吓㗎,就算有公司幫你管理,都要周不時影啲相或搵啲生活瑣事,upload上去畀人鞭吓,肥又話肥瘦又話瘦,影嘢食又港女,影本書又扮文青,仲要呢幾年社會分裂兼中港矛盾,總有人逐隻字驗屍咁幫你憑空想像你嘅政治取向同立場。講真,仲衰過以前畀雜誌亂寫,而家係上網被人鬧完雜誌再攞嚟寫,衰多兩錢重。所以嗰幾個外國後生女係有guts㗎,拍戲之嘛做乜要受人欺凌,食得鹹魚抵得渴都要衡量吓係咪值得,勉強冇幸福,如果delete account真係成為到潮流,對好多藝人嚟講其實係一種解脫。

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

 

魯連FB專頁::https://www.facebook.com/lolinhk
  1. 更多
  1. 書展開幕 有市民通宵排隊等候入場
    1小時前
  2. 美國會議員阻止放寬對華為禁令
    1小時前
  3. 德國前防長當選下任歐盟委員會主席
    1小時前
  4. 解放軍最強武裝直升機在高原實彈演習
    1小時前
  5. 香港示威者當選時代雜誌互聯網25大最具影響力人物
    3小時前
  6. 【晨早新聞重點】(7月17日)
    3小時前
  7. 【報章A1速覽】市民投訴 促新城市廣場交代放警入場;零售業料暑期生意雙位數下跌
    4小時前
  8. 中環德輔道中爆地底水管交通受阻
    4小時前
  9. 美股下跌 因特朗普再威脅對中國開徵關稅
    4小時前
  10. 特朗普稱低利率將助刺激美股
    4小時前