0
0
〈娛樂乜乜乜〉地有幾厚?天有幾高?

〈娛樂乜乜乜〉地有幾厚?天有幾高?

【Now.com娛樂】是日心情鬱悶,寫啲身邊小事。

話說尋晚一個人去麥記食晚餐,前面張枱坐咗兩個中學生,細細聲傾緊偈,斯斯文文咁。突然佢哋四圍望咗一輪,見人唔多,就好大聲用手機播歌,聲量係iPhone開盡咁上下啦。我又唔覺反感,因為佢哋播緊A$AP Rocky,我都okay,而且播幾句就收番細,見無人投訴又開大聲聽幾句咁,睇得出佢哋好開心。幾得意吖,呢個年代仲有人鍾意聽歌,我諗返細個「焚機」嘅年代。

但我可能係成間麥記唯一一個覺得無問題嘅人,慢慢發覺四圍嘅人開始燥底,眼厲厲望住。隔離枱有個師奶背住佢哋單打咗幾句:「乜而家啲學生咁無公德心。」但佢個幾歲嘅細路喺度大大聲背緊書。同一時間老遠一個阿叔走過嚟鬧,一口鄉音炒蝦拆蟹都唔知鬧咗乜,兩個學生哥關咗個電話一直講唔好意思,講到阿叔鬧飽返埋位。唔好誤會,我唔係話學生開大電話聽歌係啱,但我身在現場又真係唔覺得過份到神憎鬼厭。

於是我同佢哋傾偈,佢哋好有禮貌,話其實真係無乜地方可以唔戴耳筒開懷咁一齊聽歌,學校當然唔得,屋企人多又逼,連自己房都無點一齊聽歌?出街大聲播又好似古惑仔,咁啱見麥記少人先試吓,結果都係嘈到人,佢哋唔明點解大媽可以隨街開大喇叭唱歌跳舞,但佢哋唔得?我聽完都好無奈,感覺就如同之前聽到後生仔爆房都無地方一樣,係邊個嘅錯呢?無錢連聽歌都無自由,於是我分享細個會去沙灘焚機,佢哋話可以試吓。

之後轉個話題,講A$AP Rocky,佢哋其實都唔太認識呢個rapper,係偶然打籃球識咗個外國朋友,介紹佢哋聽嘅,一聽就愛上,仲話聽得多而家英文進步咗好多,好事吖,我以前都係睇美劇學英文,玩online game學台語。最令我感動嘅係,學生哥聽歌係聽正版,真金白銀用零用錢買。佢哋話其他同學都唔太聽歌,通常都係玩手機game,有幾個女同學會聽吓K-pop,但佢哋唔鍾意,原因係:「我哋唔鍾意啲大部分人都鍾意嘅嘢。」呢句說話好對我脾胃,兩個好有禮貌嘅學生哥骨子裡其實係反叛,我覺得後生應該係咁。

好開心遇到兩個咁鍾意聽歌嘅學生,仲要學到英文,對我呢啲工作同娛樂文化有關嘅人嚟講係一種鼓舞。但唔知點解傾完後有一種淡淡嘅哀傷,有一刻覺得佢哋將來長大應該會對社會幾失望,而家係咁,越有自我,越對社會文化敏感嘅後生仔,就活得越苦,香港社會只會對佢哋比而家更苛刻。唯一可以令自己過得開心啲嘅係麻木,後生仔要知道地有幾厚,天有幾高,要學會與無力感共存,因為上兩代已經將你哋嘅希望賣走咗。

  1. 更多
  1. 遊行上訴委員會決定721遊行終點在灣仔
    1小時前
  2. 香港民族陣綫承認被補人士是組織成員
    3分鐘前
  3. 藝人任達華中山遇襲受傷 疑犯被當場制服
    1小時前
  4. 荃灣檢獲懷疑爆炸品 單位內有政治標語衣物
    1小時前
  5. 曾鈺成:目前最佳方法非要求官員問責下台
    1小時前
  6. 蔡英文在丹佛演說再提及香港
    1小時前
  7. 北美多個城市遭熱浪襲擊
    1小時前
  8. 威尼斯有遊客在景點煮咖啡被罰款
    1小時前
  9. 民建聯約見港鐵促檢視沙中綫通車安排
    1小時前
  10. 藝人任達華中山遇襲腹部中刀
    3小時前