0
0
〈娛樂乜乜乜〉走難到台灣

〈娛樂乜乜乜〉走難到台灣

【Now.com娛樂】我好鍾意台灣,旅行連埋工作大概去過三十次以上,台中係我去過世界上覺得最想長住嘅地方,甚至有幻想過去開間cafe平平靜靜過一世。的確,身邊有唔少朋友都過咗台灣,例如有音樂人朋友在香港發展不如意,但去到台灣就有一番事業,而佢唔係移民,而只係長住,隔幾個月返出境一次,不知幾好。又有舊同學嫁咗過去,亦有朋友過去開精品店、民宿、教潛水,基本上去到台灣一定搵到朋友聚舊。我羨慕㗎,有時甚至覺得台灣比香港更似自己屋企,講真呢幾年我去西門町次數加埋一定多過去旺角。

結果我係冇咁做到,但我其實有過咁嘅機會,有朋友話佢可以安排好,過到去有工返,人工仲唔錯,有地方落腳,可以去重新做人,結果我都推咗。勇氣係一個問題,但背後有種更強烈但講唔出嘅情緒同自己講唔好,當時我唔太清晰,但睇咗幾集杜汶澤《走佬去臺灣》我就明晒。

最初係以睇搞笑節目嘅期待咁去睇,結果當然冇失望,事實阿澤好少令我失望,完全keep到水準。睇佢學溝女台語去做茄哩啡,聽吓粗口聽吓有味嘢,係好笑㗎,但睇多兩集我開始笑唔出,開始get到「走佬」嘅味道。佢好多嘢都有啲意思,你會見到台灣後生仔可以追求夢想之餘都生存到,台北生活指數算高但4千蚊呎都買到樓,仲要住得有空間有尊嚴,做生意有得賺吓唔使做到隻狗咁幫人供舖,唔夠錢上舖都可以落街擺檔用勞力換生活,仲有自己嘅identity、自豪嘅威士忌,連幾冷門嘅文化都有生存空間。其實呢啲咪就係我想有嘅嘢囉!我唔係想不勞而獲,或者勞而不獲,而係希望努力工作可以換來生活,而唔係只得生存。所以好多香港人去台灣住,真係「走佬」,你話「走難」都得,佢哋離開屋企只不過想搵返失去咗嘅生活。

所以我冇過台灣,睇完幾集就清楚自己係唔服氣,走咗咪即係認輸?但其實點都冇得贏。另外一個原因,係台灣都變差緊,成日都有人話今日香港,明日台灣,過到去又要重新經歷一次社會墮落,咁走嚟有乜謂?我痴線都似!咁不如留低受,始終係自己屋企,又有咁多屋企人,惟有有難同當。當然你可能從節目睇到其他觀點,但基本上都會對比返自身,呢啲咁發人深省嘅節目去邊度搵?拍台灣拍到咁本土,我真心要寫個服字。

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

 

魯連FB專頁::
  1. 更多
  1. 書展開幕 有市民通宵排隊等候入場
    1小時前
  2. 美國會議員阻止放寬對華為禁令
    1小時前
  3. 德國前防長當選下任歐盟委員會主席
    1小時前
  4. 解放軍最強武裝直升機在高原實彈演習
    1小時前
  5. 香港示威者當選時代雜誌互聯網25大最具影響力人物
    3小時前
  6. 【晨早新聞重點】(7月17日)
    3小時前
  7. 【報章A1速覽】市民投訴 促新城市廣場交代放警入場;零售業料暑期生意雙位數下跌
    4小時前
  8. 中環德輔道中爆地底水管交通受阻
    4小時前
  9. 美股下跌 因特朗普再威脅對中國開徵關稅
    4小時前
  10. 特朗普稱低利率將助刺激美股
    4小時前