0
0
〈娛樂乜乜乜〉不愛周董就拉倒

〈娛樂乜乜乜〉不愛周董就拉倒

〈娛樂乜乜乜〉不愛周董就拉倒

【Now.com娛樂】聽咗周杰倫首新歌《不愛我就拉倒》未?又唔係話好聽到非聽不可,但首歌引來嘅輿論,又真係值得自己去聽吓。話說首歌MV前日上載,一日唔夠就已經有2百幾萬view,堅勁,勁之餘仲幾好笑,因為首歌係周董自己填詞,填得認真麻麻,於是好多大陸網民去方文山微博求救,叫佢幫手填過啦唔好嘥咗首歌咁話

平心而論,作為一個聽咗周董咁多年嘅香港人,第一次聽《不愛我就拉倒》正常係唔會覺得有問題嘅,因為不嬲我都聽唔到佢唱乜㗎啦,就算方文山填都一樣,唔睇歌詞都唔知唱乜。無所謂㗎,我buy佢咪得囉,今次首歌水準唔係話好高,情歌加段rap咁,正正常常啦,都叫做keep到個洗腦程度,聽落都唔錯。一邊聽一邊睇comment,見到兩批人,一批彈到飛起,一批護緊航,即刻碌返上去睇埋啲歌詞,又真係幾精彩,難怪啲人咁掛住方文山。

最出事係呢段:
// 不愛我就拉倒,離開之前,不要愛的抱抱。反正我又不是沒有人要,哥練的胸肌,如果你還想靠,好膽你就麥造 //

如果用廣東話講,應該會係咁:「唔鍾意我就算數,離開之前,唔要愛的抱抱。反正我又唔係無人要,我操出嚟嘅胸肌,如果你仲想挨吓,有膽你就咪走!」係咪好笑先?唔係意境差咁簡單,係根本無意境!亦唔係歌詞靚唔靚嘅問題,而係根本娘到爆,講出嚟都嫌老土,唱出嚟直頭要打冷震!

周杰倫 Jay Chou【不愛我就拉倒 If You Don't Love Me, It's Fine】Official MV::https://www.youtube.com/watch?v=MAjY8mCTXWk

但又咁,周董填詞不嬲都係好似填demo咁,除咗頭幾年會正正經經填之外,之後都好隨心,同佢啲頭髮一樣。記得第一次唱K唱佢首《黑色幽默》,亦係第一次認真睇住份歌詞,佢嗰句「在一起有點勉強,該不該現在休了我」時我係呆咗,聽落咁靚嘅歌,呢句咩詞嚟㗎?仲有好多例子,《手語》:「牽你的右手,親你我會先漱口。」《大笨鐘》:「過這麼久怎麼還沒叫我還你DVD?」《公主病》:「你丟飛盤我學狗來接,汪!」《超人不會飛》:「要控制飲食不然就跟杜莎夫人蠟像的我不像。」仲有好多不能盡錄。

與其話佢亂嚟,不如話係天馬行空,有咁嘅腦袋先有咁嘅才華,同時先填到咁奇葩嘅歌詞,奇葩到一個地步係成為一種風格,調返轉你叫方文山填都未必填得到呢個思路。有才華又咁成功就可以任性,你都吹佢唔脹,學佢話齋,「不愛我就拉倒」,哥填的歌詞,如果你還想聽,好膽你就麥造!

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

 

魯連FB專頁::https://www.facebook.com/lolinhk
  1. 更多
  1. 本港新增五宗確診 全屬輸入個案沒帶變種病毒
    本港新增五宗確診 全屬輸入個案沒帶變種病毒
    2小時前
  2. 以巴阿克薩清真寺衝突至少200人傷
    以巴阿克薩清真寺衝突至少200人傷
    15分鐘前
  3. 本地遊復辦 全團三十人以內須使用安心出行
    本地遊復辦 全團三十人以內須使用安心出行
    23分鐘前
  4. 佐敦伯嘉士大廈居民完成21日檢疫已回家斥不公平
    佐敦伯嘉士大廈居民完成21日檢疫已回家斥不公平
    40分鐘前
  5. 中國籲聯合國成員抵制討論新疆會議
    中國籲聯合國成員抵制討論新疆會議
    1小時前
  6. 緬甸待局勢穩定後才考慮讓東盟特使到訪
    緬甸待局勢穩定後才考慮讓東盟特使到訪
    1小時前
  7. 【5月8日疫情速報】(17:00)
    【5月8日疫情速報】(17:00)
    1小時前
  8. 福建推遲放寬台灣民眾入境隔離措施
    福建推遲放寬台灣民眾入境隔離措施
    2小時前
  9. 區議員:接獲通知荃威花園檢疫人士料最快下周可離開
    區議員:接獲通知荃威花園檢疫人士料最快下周可離開
    2小時前
  10. 【持續更新】香港新型冠狀病毒肺炎確診個案追蹤
    【持續更新】香港新型冠狀病毒肺炎確診個案追蹤
    3小時前