0
0
〈娛樂乜乜乜〉不為虛度年華而羞恥

〈娛樂乜乜乜〉不為虛度年華而羞恥

〈娛樂乜乜乜〉不為虛度年華而羞恥

【now.com娛樂】楚原叔在金像獎台上一席話,引嚟好大迴響,唔單止由破票房紀錄到同方逸華一段恩怨非常juicy,幾句道盡佢口中嘅「歡聲、淚影」,更加由一個屬於電影嘅終生成就,昇華到探討人生嘅終極意義。呢番說話充滿文采,但只有文采係唔夠,仲要有閱歷,看透人生,先可以講得咁入心入肺。

聽完,感動完,可能過幾日就忘記,唔可以話錯嘅,因為我哋嘅人生不斷被「延續」消磨,現實環境令我哋要花大部分時間搵食,無幾可得閒坐低審視自己人生,所以楚原叔說話有意思,但大部分人都唔會消化得晒。

「任何人無論你尋日幾風光,亦無論尋日幾失意,聽日天光時一樣要起身做返一個人,繼續生活落去,因為明天總比昨天更好。」呢句說話乜嘢人有能力唔係扮嘢咁衷心講出?得三種人,第一種,老人家,即好似楚原叔咁80幾歲人經歷過高低起跌然後睇透人生本質;第二種,生命走到盡頭嘅人,人要走未必經歷老,好後生就可以離開,老亦唔一定到盡頭,人已經越來越長命,但當知道時間在倒數,自然會有感悟;第三種,細路仔,如果無人虐待無人強逼,小朋友天生就識得尋開心,今日開心,第二日起身再玩過,今日唔開心,第二日起身都係再玩過。

即原來人生只有一頭一尾係清醒,係正面地活著。我哋天生就識嘅嘢,經過生活不斷嘅挫磨,要去到後段先至搵得返。所謂成長,所謂做大人,我哋最精華嘅時間係盲目咁過,風光時受唔到挫折,失意時不斷沉溺,為一啲熄燈後就唔存在嘅成就營營役役,無數個夜晚失眠,起身後繼續煩惱。「明天總比昨天好」只會發生在星期五,或月尾出糧前,到星期日同埋交完租供完樓後,明天又係地獄開始。我哋都係做返一個人,繼續生活,只不過欠咗個靈魂。無辦法,正正就係因為驚老咗無得撈,所以趁後生剩返個錢,但錯誤地將過程視為結果,咪集體搞成咁。

「當你回首往事時,不因碌碌無為而悔恨,不為虛度年華而羞恥。」點解呢句書本裡面早已存在嘅說話,突然觸動到咁多人呢?因為楚原叔在短短十分鐘將我哋由南風西風帶到一個北風嘅氛圍,稍為停一停低望望手上嘅事情,如果而家一架車撞埋嚟就咁走咗,悔恨同羞恥,剛好就係呢一刻嘅狀態,我,有負此生啊!諗深一層,自然一額冷汗,楚原叔將一生人嘅經驗濃縮入一番說話中,真係唔好聽完就算咁嘥料,搵時間咀嚼吓,試吓改變自己,唔係老來先醒返起明明一早有人提晒水,仲行多幾十年冤枉路,雖然我哋一場嚟到就係學呢啲,但都無謂啦!

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

 

魯連FB專頁::https://www.facebook.com/lolinhk
  1. 更多
  1. 【立會選舉】政府:時間緊迫 重新劃界無進行諮詢
    【立會選舉】政府:時間緊迫 重新劃界無進行諮詢
    11小時前
  2. 強生主動押後在歐洲推出疫苗
    強生主動押後在歐洲推出疫苗
    6小時前
  3. 友愛邨愛暉樓第三座22樓住戶撤離檢疫
    友愛邨愛暉樓第三座22樓住戶撤離檢疫
    6小時前
  4. 【持續更新】香港新型冠狀病毒肺炎確診個案追蹤
    【持續更新】香港新型冠狀病毒肺炎確診個案追蹤
    7小時前
  5. 【4月13日疫情速報】(22:40)
    【4月13日疫情速報】(22:40)
    7小時前
  6. 政府收緊民航客機抵港熔斷機制
    政府收緊民航客機抵港熔斷機制
    7小時前
  7. 【持續更新】新型冠狀病毒疫苗接種資訊
    【持續更新】新型冠狀病毒疫苗接種資訊
    7小時前
  8. 新增3宗本地確診 深井麗都花園第二座需圍封強檢
    新增3宗本地確診 深井麗都花園第二座需圍封強檢
    7小時前
  9. 日本建議與德國舉行聯合海上演練
    日本建議與德國舉行聯合海上演練
    7小時前
  10. 美國當局籲停打強生新冠疫苗
    美國當局籲停打強生新冠疫苗
    7小時前