0
0
〈娛樂乜乜乜〉全球網民最喜愛鬧嘅頒獎禮

〈娛樂乜乜乜〉全球網民最喜愛鬧嘅頒獎禮

〈娛樂乜乜乜〉全球網民最喜愛鬧嘅頒獎禮

【now.com娛樂】每年一度《萬千星輝頒獎典禮》,近幾年頒完都成箭靶,今年都唔例外。我無抱任何期望去睇,其實唔留心睇,淨係望吓邊個攞獎,王浩信、馬國明、唐詩詠、蔡思貝、Do姐+農夫,呢個list算係正常嘅,但好多人都好嬲,我都睇到火嚟。我最初都唔明自己嬲乜,直至見到《降魔的》攞全球網民最喜愛劇集,全球喎!但同時佢又唔係最佳劇集,即是一部全世界都最鍾意嘅劇並唔係最好嗰部劇,咁你個電視台拍劇係為乜呢?好似電影咁為藝術?又唔覺呀。而我得出個結論係啲獎個名有問題,或者啲獎個定義有問題,而令到唔適合嘅人攞到唔適合嘅獎。

劇集獎剛才講咗啦,其實攞最佳劇集嘅《誇世代》並唔差過《降魔的》,講真今年TVB難得有幾部劇稱得上係好睇嘅,《心理追兇》、《踩過界》、《超時空男臣》、《降魔的》、《誇世代》,都可算係平均質素甚高嘅一年(《不懂撒嬌的女人》我真係唔識欣賞,sorry我係不懂欣賞的男人),我覺得甚至《踩過界》攞都可以合理。問題係為咗觀眾一面倒鍾意《降魔的》同埋想開續集,而夾硬加多個全球網民最喜愛劇集,其實可以唔使將個名改到咁勁,全球TVB觀眾唔得嘅?而家成件事唔合理到連豬肉獎都形容唔到,全球網民有幾多十億?一部幾十億人最喜愛嘅劇集並唔係你嘅最佳劇集,你個台都好巴閉喎!

男主角獎算係最合理,「最佳主角」字面上就係做得最好嗰位演員啦,而「最受歡迎電視角色」就係個角色最受人歡迎但個演員做得好唔好就唔係最重要啦,係咪?而家得兩個選擇,盲俠王浩信同埋馬季馬國明,全年係呢兩個最好㗎喇,咁王浩信攞最佳男主角合理喎,佢用演技撐起個角色,而馬國明演技係唔及王浩信但個角色又難得一見咁好,又確實係近年最受歡迎嘅電視男角色喎!唯一鬼祟嘅係,最受歡迎電視男角色提名名單係無盲俠㗎,但就有Saving,代表啲乜?自己參透吓。

女主角獎就真係做到出面,最佳女主角唐詩詠,哈哈哈三個哈,唔好誤會我本身好冧唐詩詠,但講到做戲,視后喎,點都未有資格攞啦係咪?唔使講其他,同劇另一個提名人係宣萱,做得好過唐詩詠幾十倍,視后資格你個台點定義呢?如果覺得個角色最有noise,咁應該係頒最受歡迎電視女角色俾佢吖,2017年全年唐詩詠最好戲?你真係夠膽講?害死佢呀!蔡思貝又係一個謎,癲姐佢係演得好,但點會最受歡迎呢?最受邊個歡迎?個提名名單係好難揀㗎,如果要揀真係寧願揀《降魔的》黃智雯,甚至熊若水呂慧儀,起碼最多人睇先。

其他獎都想講幾句,男女配角,陳山聰同朱晨麗,都係入圍五強裡面最差嘅(個人意見),同埋男配提名居然無何廣沛?佢拍完部戲做得咁好,男主角又唔係男配角又唔計,結果係最受歡迎電視拍檔,安慰獎都殺啦。飛躍進步男藝員俾咗楊明,其實佢飛躍咗好多年㗎喇,就嚟落地先俾佢,睇下佢今年對手,張振朗、何廣沛、胡鴻鈞,全部都飛躍過楊明,但前面塞車後面再等下個燈位啦,始終走唔出惡性循環。真係睇成晚唔知睇咗啲乜,後悔已經太遲。

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場

  1. 更多
  1. 政府圍封佐敦伯嘉士大廈 強檢後無發現確診個案
    政府圍封佐敦伯嘉士大廈 強檢後無發現確診個案
    1小時前
  2. 【4月17日疫情速報】(09:40)
    【4月17日疫情速報】(09:40)
    22分鐘前
  3. 日本軟件工程師創造初步表情符號
    日本軟件工程師創造初步表情符號
    25分鐘前
  4. 菲臘親王葬禮本港時間今晚舉行
    菲臘親王葬禮本港時間今晚舉行
    25分鐘前
  5. 政府收緊公司查冊 許正宇:安排與時並進
    政府收緊公司查冊 許正宇:安排與時並進
    25分鐘前
  6. 邱騰華:緊張本港可能涉及病毒基因變異個案
    邱騰華:緊張本港可能涉及病毒基因變異個案
    25分鐘前
  7. 美國印州聯邦快遞八死槍擊案槍手身份公布
    美國印州聯邦快遞八死槍擊案槍手身份公布
    1小時前
  8. 報道指中國將批准使用外國製新冠疫苗
    報道指中國將批准使用外國製新冠疫苗
    1小時前
  9. 菅義偉稱與拜登討論台灣及新疆問題
    菅義偉稱與拜登討論台灣及新疆問題
    1小時前
  10. 智利指科興疫苗預防有症狀感染有效率為67%
    智利指科興疫苗預防有症狀感染有效率為67%
    2小時前