0
0
〈娛樂乜乜乜〉而家做藝人,都係誠實好啲

〈娛樂乜乜乜〉而家做藝人,都係誠實好啲

【now.com】鄭俊弘何雁詩呢段戀情,可以用慘烈形容,女嘅就被認為係橫刀奪愛,男嘅直頭被封為世紀賤男。唔好意思其實我覺得呢個term幾好笑,因為呢個世紀都唔知出咗幾多個世紀賤男,約埋食餐飯,分分鐘幾圍都唔夠坐,好似冇乜代表性咁。慘成咁,都唔怪得人,一開始企定認咗佢咪好囉,點解要大話連篇?所以話做人冇公關,真係唔好出嚟行,至理名言呀。

而家八卦雜誌手法同以前有啲唔同,更加陰險,更加有鋪排。要知道狗仔隊已經式微,政治狗仔隊唔敢講,間中依然勇猛,但娛樂狗仔隊真係好多年都冇猛料返。而家啲封面,十個有八個都係創作為主,聽到少少空穴來風,就用大家已經知道嘅新聞串埋一齊,加啲幻想,寫個故仔呃你俾錢,其實冇嘢睇,廢話連篇。

因為有價值嘅明星已經越來越少,又越來越識得保護自己,平時出入夠小心,出去玩都去私人會所,狗仔隊最多等門口,好難咬得佢入。料返得少,八卦書又越來越少,炒人好似冧骨牌咁,行內剩餘嘅狗仔隊已經唔多,所以佢哋好餓,應該話成個行業都好饑渴。一個唔小心收到單堅料,一定唔會放過你,亦學識唔浪費每一個機會。

以前爆料係好似炸彈一樣,嘭一聲出個封面,藝人死咗先知乜事,連少少反應時間都冇,所有事就完全曝光。而家爆料就似凌遲,八卦書點會咁浪費,你知唔知幾難先有一單堅料?梗係做多幾期啦!好似鄭俊弘何雁詩單嘢咁,一開始收到風,唔出聲走去影晒相攞晒料,先出個好似冇乜實質證據嘅封面先,再去問回應。「嗱,而家咁咁咁,你認唔認?」哦,唔認,何雁詩話係普通好朋友,清者自清行得正企得正;鄭俊弘話分手唔關第三者事。連老闆何哲圖都中招,答傳媒話兩個人冇拍拖。

好,答得非常之好,雜誌覺得非常滿意,喂,大家睇清楚,呢兩個人講大話,連老闆都呃埋呀!第二日就開始爆堅嘢,影到兩個人夜媽媽拖手去睇村屋盤,你哋仲唔死?哦,冇拍拖係假嘅,至於關唔關第三者事?都去睇盤準備住埋啦,真係兩個月嘅事?無論點都已經水洗都唔清,因為你一開始已經講咗大話,冇人會再信你下一句。

冇辦法逼住要走出嚟交代,你唔知人哋手上仲有乜嘢料在手嘛!陣間原來有求婚段片在手,或者有時間證人證明兩段感情同步進行,咪大鑊?但行錯第一步,一切都已經太遲,而家人哋仲有排玩,就算冇新料,起碼可以捉住被拋棄嘅未婚妻,同埋佢嘅前度,寫返幾期寫到飽為止。

而家就係咁嘅玩法,唔單止要爆你料,仲要你出醜於人前,人格都謀殺埋。咁樣係咪欠缺一啲同情心?係㗎,不嬲呢啲書都唔係講人性sell溫情,何況而家佢哋自己都走投無路?

被人凌遲處死可以點?咪笑吓囉,證明咁多年冇白撈,原來都真係有啲新聞價值,值得被人片多幾刀,鬧多幾日。同埋邊個叫你一開始唔講真話?有啲嘢自己攞嚟,唔係可以點啫。

文:魯連

〈娛樂乜乜乜〉逢星期一至五刊登
將每日的娛樂熱話,以全新角度為大家點評,大膽假設,細心求笑,希望滿足到去到邊度都好鍾意睇娛樂新聞的你。

專欄屬作者個人意見,不代表本網立場。

  1. 更多
  1. 在內地擁有物業 公屋戶獲發遷出通知書
    在內地擁有物業 公屋戶獲發遷出通知書
    2小時前
  2. 首爾巴士司機就加薪同資方達成共識 結束約半天的罷工
    首爾巴士司機就加薪同資方達成共識 結束約半天的罷工
    14分鐘前
  3. 東九文化中心三色花海亮燈 吸引市民觀賞
    東九文化中心三色花海亮燈 吸引市民觀賞
    17分鐘前
  4. 新一期綠置居即日起接受申請 申請者:看好香港、無信心怎會入市
    新一期綠置居即日起接受申請 申請者:看好香港、無信心怎會入市
    18分鐘前
  5. 在內地擁有物業 公屋戶獲發遷出通知書
    在內地擁有物業 公屋戶獲發遷出通知書
    24分鐘前
  6. 國防部稱在南海問題做好應對突發事件一切準備
    國防部稱在南海問題做好應對突發事件一切準備
    1小時前
  7. 孫玉菡高度關注畢架山長者命案 會主動接觸不同階層長者
    孫玉菡高度關注畢架山長者命案 會主動接觸不同階層長者
    1小時前
  8. 尖沙咀藥店「両變錢」誤導旅客 海關拘男店員
    尖沙咀藥店「両變錢」誤導旅客 海關拘男店員
    1小時前
  9. 港大5月1日起實施遊客分流措施
    港大5月1日起實施遊客分流措施
    1小時前
  10. 台北疑集體食物中毒個案增至19宗 當局仍未查清致病源頭
    台北疑集體食物中毒個案增至19宗 當局仍未查清致病源頭
    1小時前