【now.com】鄧月平在《美選D.n.A》八強評判會面時話，因為成日被人話佢胸大冇腦，所以要平反。事實上胸大冇腦唔單止日日在娛樂版出現，亦常在坊間流傳，算係其中一個關於乳房大小嘅都市謬誤。
世界上當然有胸大得嚟又冇腦嘅人，正如亦都有大胸天才，因為乳房大細根本同智力冇任何掛鉤，呢個道理人人都知，但點解胸大冇腦呢句說話依然流行呢？我覺得係因為電影行業對女性醜化，經常安排性感大胸演員去演出花瓶角色，營造喜劇效果，長時間下來造成呢個形象。例如某個好出名嘅肥導演就專拍呢啲戲，由90年代拍到?家，都喜歡以女性上圍做喜劇賣點，呢類人都算係胸大冇腦嘅推動者之一。
另一原因，可能係大胸女性被標籤化後，令人產生一種只能以自己驕人身材為賣點去搵食嘅錯覺，唔可以否認的確有部分人係專登標榜大胸去增加知名度，但有更多係呢個男性主導行業被標籤化嘅受害者。我哋潛意識其實都知道以大胸做主打去Sell自己係一個幾冇腦嘅行為，但仍然樂於消費呢回事，然後又真係有好多渴望出名嘅女仔樂於被消費，成為一個惡性循環。代價係口痕友有多一個話題去品評女性嘅身材，令唔喜歡被注視嘅女性受多一重傷害。
另一個關於乳房大小嘅都市謬誤，係平胸冇奶。呢個比較科學，識得有位四十幾歲朋友，一直冇結婚，係因為十年前曾經被媽媽反對佢同一個平胸女朋友結婚，理由係「平胸邊會有生養？第時點餵人奶？」事件令朋友留下心理創傷，所以至今未娶。當然呢個係封建思想嘅極端例子，但依然有好多人，包括想生小朋友嘅女性，擔心平胸餵唔到母乳，視覺上乳房就似係儲存母乳嘅容器，但事實上母乳多寡同乳房大小冇關係，反而係同母親嘅心情有關，只要有健康嘅乳腺，唔過份緊張，就有能力提供足夠嘅母乳畀小朋友，生命就係咁奇妙，有時眼見未為真。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
