【Viu】一連5場《ANSON LO “KINGDOM” LIVE 2025》今晚喺亞博開鑼，Anson Lo以金光閃閃「埃及教主」Look登場，一口氣跳唱三首快歌《Heartbreaker》、《EGO》同《ON》，加埋小舞台嘅巨型「倒金字塔」設計，超級吸睛！教主都話為咗拉近同神徒嘅距離，今次打破咗亞博最長同最大嘅舞台紀錄！
Encore環節時，AL直言最近好大壓力，每晚都同教母傾心事，但唔敢講太多令媽咪擔心，仲話：「最近嘅我好忐忑不安、壓力爆煲嘅狀態，係你哋在場嘅每一位嘅鼓勵，先令我可以企喺台上面，多謝你哋！」隨即向神徒鞠躬致謝，再送上《青春頌》鼓勵大家克服同跨過難關，最後以《致我》作結，寄語大家要更加愛自己！
其實喺開騷前，大屏幕已列出大會有捐助仁濟緊急援助基金、東華三院大埔宏福苑事故愛心捐款、公益金及時雨大埔火災攝助基金，支持大埔宏福苑大火災民；同時列出數個情緒支援熱線，仲寫上安慰語句：「因為只有『愛』才是出口，一齊加油！」
此外，是夜捧場嘉賓有「外星三少女」Edan同Jeremy、師弟Phoebus；而神徒BB們亦有響應教主呼籲，以埃及Look入場，Respect！
