【Viu】吳尊夥中國前職業網球運動員李娜，今日對戰Alex林德信及全運會網球男單銅牌得主黃澤林，於澳門上演表演賽。4人對戰半個鐘，最後由吳尊同李娜勝出。其間黃澤林打出幾個靚開波K.O對家，吳尊即搞笑講唔鹹淡廣東話：「你打咩呀？打唔到！點打？」好Cute！
吳尊事後受訪時感激黃澤林已放咗水，如果唔係將有更多球接唔到。只有十年球齢嘅佢，話今日有帶小朋友嚟集郵順便拜師。講到言承旭、周渝民、吳建豪睽違16年即將合體展開巡唱，吳尊嘅飛輪海又有冇諗過合體？佢坦言「當然想」，始終一對仔女未睇過佢演出，希望明年有演出機會。
而Alex今日最沾沾係第一球開波已攞分，更興奮大叫：「可以收工！」佢話師承入行前喺美國做過網球教練嘅父親林子祥，幾歲就「被逼」學打波。Alex更爆囡囡好黐阿Lam同莎莉，因為兩老會偷偷俾ipad囡囡睇，亦唔介意囡囡被縱壞。Alex又認係黃澤林狂迷，經常喺IG偷𥄫對方添！想知更多就睇足本訪問片！
