【Viu】入行30年嘅音樂人伍樂城日前接受商台節目 《星光背後》訪問 ，喺節目中披露同唔少歌手嘅合作點滴！
伍樂城因趙增熹1996年監製梁漢文嘅專輯，而寫咗首支大熱作《衣櫃裡的男人》，繼而再獲英皇賞識，先後為謝霆鋒監製《無聲彷有聲》、《愛後餘生》、《非走不可》等經典作品。講到霆鋒唱《無聲彷有聲》時，流露最強嘅力量就係表達嗰種不後悔的愛情。
因為霆鋒嘅成功，英皇亦將未出道嘅Twins交畀伍樂城， 伍樂城憶述：「好多謝佢哋公司畀我哋好大自由度，無乜理我同填詞人點設計。」佢亦親眼見證Twins嘅辛苦：，「佢哋好早已經忙到死，一年等於人哋五、六年，未出道仲好啲，佢哋嘅Schedule係痴線嘅，突然間就話要出，唔係一首歌喎，係一隻碟。好彩係兩個，嚟到一個瞓一陣先、一個叫嘢食錄歌先，所以連我根本都無得瞓，但亦訓練到我無乜問題解決唔到。」
伍樂城都先後同過四大天王合作， 佢提到監製、灌錄劉德華與梁朝偉合唱嘅《無間道》係相當夢幻嘅事。佢大爆自己擊敗唔少競爭對手：「我哋寫歌都係靠投稿，我要再次好多謝陳德建先生，當時佢處理晒劉德華先生嘅電影，好記得當時我食緊飯，求其問佢要唔要歌，佢話有套電影，故事係：『兵就係賊，賊就係兵！』就係咁多，我就即刻諗到Intro，仲即時喺餐廳攞張紙巾寫喺上面。」
佢繼續分享寫歌趣事：「其實我寫好多歌都係同人食緊飯，《風箏與風》都係咁寫出嚟。最後好好笑，陳德建話恭喜我，佢哋最後揀咗兩首，其中一首係我，咁仲慘，我嗰陣幾日都瞓唔著，End Up中咗，係好開心！」
