日本出局後列隊向球迷致意。
(©AFP)
【Now Sports】要同日本、韓國說再見，出局但贏盡口碑，係好多球迷心目中嘅「冠軍」，都係亞洲驕傲。多謝兩隊為球迷帶嚟好幾個熱血沸騰嘅晚上！
撰文：球十三
噚晚第一支送走嘅「冠軍」係日本。場內，日本先後打敗兩個前冠軍德國同西班牙，兩場都係反勝，所展示嘅鬥志冇得頂。藍武士係今屆唯一小組首名嘅亞洲隊，埋單計亦係今次亞洲隊喺賽事嘅冠軍（見附表）。去到淘汰賽互射12碼輸俾歷來喺決賽周次次射贏嘅老手克羅地亞，無話可說。
至於球員用完更衣室後執拾得井井有條，留紙條為工作人員送上祝福，而球迷喺觀眾席繼續展示主動執晒垃圾嘅美德，係影響緊全世界。
韓國同樣都係「冠軍」，亦係最後一支告別今屆決賽周嘅亞洲隊。喺分組賽同樣能夠逆境求生，最後一場反勝葡萄牙已經相當了不起。面對足球王國巴西大敗，只怪實力係有明顯距離，現階段係攀不過嘅高牆……，球員大幅比數落後繼續拼，最後整腳世界波破蛋謝幕，球迷現場吶喊聲未停過……
輸得肉酸？講緊係賽事可能冠軍球隊，唔啱你搵隊歐洲二線隊試吓吖，面對呢晚咁高水準嘅巴西，結果都可能一樣。太極虎平咗喺自己國土（2002得殿軍）以外嘅最佳成績（2010年同樣16強止步），加埋場上鬥志旺盛，又係贏盡口碑，今屆冇枉過。
日韓世界盃8強對撼嘅戲碼，不日上映，最快要4年之後，等唔切？期待雙雄明年亞洲盃決賽相逢。
今屆亞洲隊成績
日本 2勝1和1負 16強出局
韓國 1勝1和2負 16強出局
澳洲 2勝0和2負 16強出局
沙特阿拉伯 1勝0和2負 分組賽出局
伊朗 1勝0和2負 分組賽出局
卡塔爾 0勝0和0負 分組賽出局
*只計法定時間