【Now Sports】唔到你唔服,當大家認為加利夫巴爾事業已過高峰,去美國發展係打Golf多過踢波,嚟到世界盃,一腳波就打救條紅龍。
撰文:球十三
就憑加利夫巴爾(Gareth Bale)尾段入12碼,威爾斯闊別世界盃超過60年後首場比賽力保不敗。老實,呢位仁兄成場表現唔起眼,佢未入波前,十三印象最深刻係佢攞面黃牌(查實佢落腳包晒個波,有啲冤枉),但當球隊得到12碼,佢就當仁不讓操刀。
十三唔係馬後炮,當刻就覺得佢入硬,但見佢吸幾啖氣後,好似有少少緊張,其實係認真,果然射個波勁道十足,門將捉到路都冇用。得咗!賽後領隊彼治話1000000%對巴爾交託重任,啱,我係佢都對大將信心爆棚。
球星就係咁,成場冇影,關鍵時刻需要佢就發揮作用。冇話勇於小戰、怯於大戰,呢啲就叫大賽球員。
其實巴爾球員生涯,無數次展示心理質素好,無論係2016年歐洲國家盃、幫皇馬贏幾次歐聯,都喺關鍵時刻做到嘢。唔好聽我齋噏,睇數據,佢為紅龍入嘅41球波,有35球係嚟自競賽(即係非友賽),即係啲入波多數有份量。
威爾斯人苦等兩三代,由呢位堪稱紅龍近代最具代表性球員入波,標誌重返決賽周,最適合不過。
撰文:球十三
足球迷叫第十二人,冇偏愛,冷眼旁觀係十三。