【Now Sports】F1來到今季第10站賽事英國銀石賽場,除咗係對上10年贏足8次嘅咸美頓(下稱咸爺)主場出賽外,仲有咸爺隊友羅素及麥拿倫嘅羅利斯同樣係返家鄉力求一勝。
不過最近呢個星期被炒作得最熱嘅,係前F1世界冠軍畢奇(Nelson Piquet)去年底批評咸爺嘅一段留言,被外國媒體翻舊帳引起激烈迴響。由於當中牽涉到種族歧視字眼,所以過往致力對種族歧視說不嘅咸爺,獲得不少圈中人支持。「陸仔」陸克萊更發表聲明,力撐咸爺多年來對F1貢獻良多,理應得到更多尊重。其實心水清嘅車迷可能一早已知,畢奇係韋斯塔本嘅「準外父」,無他嘅,正所謂「司馬昭之心」吖嘛!不過畢奇最後都係向咸美頓發出道歉聲明,或者可以令事件真正告一段落。
講返歷史悠久嘅銀石賽場,係英國賽車運動發源地,於1950年成為首場F1嘅賽場,所以一直以來都係F1車迷嘅潮聖地。對於有兩名車手主場出賽嘅平治車隊賽前接受訪問時,確認今場戰車有進一步更新。大家不要忘記,今季整體戰鬥力下降的平治,出乎意料地從未試過Did not finish(DNF),羅素更是唯一可以每場都在前5完成賽事的車手,總成績甚至比大師兄咸爺更好。相比起紅牛及法拉利,戰車整體的可靠度其實更高,唯獨不夠快而已,預計最多可「坐爆」15萬名車迷及主場車迷的吶喊助威下,看看幾名主場車手係咪真係可以反底成功?
F1英國站
Now TV 680台直播
01/07 19:55 練習賽1
01/07 22:55 練習賽2
02/07 18:55 練習賽3
02/07 21:55 排位賽
03/07 21:45 主賽事
撰文:MJ,一個喜歡用蔗渣價錢落街買燒鵝…味薯片的小編