米克舒密加戰車分成兩截。
(©AFP)
【Now Sports】就算米克舒密加（下稱米克）唔使半夜開車送豆腐，我都有理由相信米克最近睇嘢愈來愈慢，表示佢手車已經愈來愈快，快到撞完一次……又一次。
正所謂「人無事先可以做世界冠軍」，米克最近接二連三炒車當食飯，上場摩納哥站戰車更加撞到一分為二，好在，最終人無事！據報呢一撞，維修費已經要100萬美元，認真誇張！
哈斯車隊對此表示很難過亦很難捱，事關F1有預算上限，2022年賽季所有車隊總開支不能超過1.4億美元，隊隊都要為節省開支而苦苦掙扎，隨著車手撞車而引起的維修費，準備成本亦是車隊另一頭痛問題。為此，今季兩大頭目法拉利及紅牛都暗示過，最終可能因超支而受罰，最壞情況是要停賽或未能完成賽季。不過一切言之尚早，我認為一切都是語言藝術，將壓力交返畀FIA，但求FIA之後將門檻放寬以免受罰。
截至上場為止，米克今季總維修費用已接近320萬美元，緊隨其後嘅拉迪菲亦接近290萬美元，大幅拋離其他車手，長此下去都唔係辦法。米克F1生涯至今仍未得到任何分數，最近有傳言哈斯車隊對他表現十分不滿，有意來季轉換其他車手。難得車隊今季打造了一款有競爭力的中檔車，理應可在中游份子中激鬥一番。
空穴來風定必有因，相信如果米克表現繼續低迷，就算本身有幾大名氣，都很快聞到「魷魚香」。仔呀仔，咪丟老豆架先得呀！
F1阿塞拜疆站
Now TV 680台直播
10/06 18:55 練習賽1
10/06 21:55 練習賽2
11/06 18:55 練習賽3
11/06 21:55 排位賽
12/06 18:45 主賽事
撰文：MJ，一個喜歡用蔗渣價錢落街買燒鵝…味薯片的小編