【Now Sports】恭喜皇家馬德里奪得第14次歐聯冠軍。前文提過嘅心理堅韌力同信心，相信大家都一一喺決賽前後睇到，但咁重要嘅比賽，點樣處理焦慮（anxiety）情緒？皇馬決賽前被睇低一線，但隊波由準備工作（酒店/媒體開放日）到比賽策略方面都做得好好，成功將焦慮（包括球迷嘅）轉化為令人喚醒（arousal） 嘅振奮鬥志！令世人大跌眼鏡奪得冠軍！
撰文：June
焦慮（anxiety）與喚醒（arousal）
於極端壓力或者重要比賽入面，有球員表現會比預期/平時差，呢個稱為「窒息choking」，通常係由過度焦慮引起。過度焦慮對人嘅思想、身體同行為會有不同程度嘅壞影響。
焦慮程度其實係受以下因素影響：
——自我意識入面，覺得事件嘅重要性
——焦慮性格
——將結果歸因於內在抑或外在因素嘅分野
——完美主義，常設定不可能嘅高標準
——害怕失敗
——信心不足
（部份上兩篇文章已提及）
一場比賽，只要一個球員/教練崩盤，足以致命，呢個情況，喺2018年歐聯決賽（皇馬對利物浦）嘅利記門將卡利奧斯身上就發生過。
相反，有球員表現會比預期/平時好，就係我哋所講嘅「大賽球員」；而今屆皇馬球員同教練落後或被壓迫時都好淡定，因為佢哋一早成功將緊張焦慮情緒轉化為喚醒（arousal）身心努力嘅鬥志。
記得古圖奧斯首季嚟到皇馬，都俾人笑佢失好多波，下三路差，常俾人通「大細龍門」，而皇馬2014年喺歐聯決賽，由拉莫斯追和馬德里體育會嘅一球，把關者就係古圖。雖然嗰球係非戰之罪，但古圖受訪時，都有講隊友見到呢個片段，間中都會笑佢，令佢更想做好啲。近兩季古圖表現換得大家掌聲之餘，決賽神級表現仲拎埋比賽最佳球員，相信佢已經成功將失敗嘅焦慮（anxiety）情緒轉化為喚醒（arousal）身心嘅鬥志。
理論上，人係需要一定程度的壓力（或喚醒）同緊張情緒先可以發揮出最佳狀態，但太緊張可能會導致一個人崩潰。 首先，要區分情緒係屬於焦慮定喚醒身心嘅性質。 後者係一種令人會做好準備嘅身體能量，涉及深層心理同生理啟動。
如果心理同生理啟動，係由一個人嘅深層睡眠伸延到強烈興奮嘅狀態，可以想像好似一個山咁嘅倒U型，狀態無論喺一頭一尾都唔係好事。我哋必須搵出一個最佳喚醒位置（倒U嘅頂端），從而發揮最佳狀態。
每個人喚醒位置（高同闊度）都唔一樣。而同一個人，身處唔同環境喚醒水平都有機會唔一樣。而同一個環境，有人會焦慮緊張；但有人又會覺得平靜或者興奮。好似皇馬球員施巴約斯賽後訪問指：「前一晚我瞓唔著（佢第二次晉身決賽）；但決賽前幾個鐘就見到賓斯馬，卡華查同摩迪喺更衣室玩啤牌，覺得現場有一份冷靜。」
再睇返賽前訪問，皇馬球員都係講希望享受決賽。每逢歐聯，皇馬都會舉辦媒體開放日，睇返轉頭都同壓力管理有關。因為運動心理學家平常會教運動員透過以下方法管理壓力，包括：
自我對話（Self-talk）
視覺化（Visualization）
呼吸與放慢（Breathing and slowing down）
放鬆心情（Relaxation）
堅持比賽前例行習慣（Sticking to pre-performance routines），儀式感好重要
準備充足放鬆心抵達巴黎
球隊選擇住喺比賽場地北面嘅超五星級酒店，有米芝蓮餐廳，容許球員喺比賽前一晚同家人同住；而場地Stade de France 位於巴黎北部嘅公路出入口，酒店除咗舒適外，根據以前揸車去過該場地嘅個人推測，酒店位置都係方便球隊可以由北面公路直接抵達球場。
球員心理準備喚醒鬥志
皇馬設媒體開放日俾每個球員同媒體傾偈，更由傳奇球員卡路士訪問球員講吓心情。做重要事之前，能夠梳理自己情緒係好重要。同傳媒訪問令球員有機會自我演練一次（自我對話)，了解自己當刻心情，調節返適當嘅情緒。
賓施馬賽前訪問表示，球隊好平靜，冇感受到壓力，仲識講笑話致勝方法係比對方入更多波（放鬆心情），而古圖就表示會比平時早瞓半個鐘同埋食好少少（儀式），而且佢自稱已經將射12碼場景不停喺腦入面演練（視覺化）。卡華查亦將比賽視覺化，一場11對11人，90分鐘，一個波嘅賽事。最後，賓斯馬、卡華查、卡馬雲加、洛迪高同卻奧斯都不約而同講要享受決賽。卻奧斯更指，愈能夠享受比賽會踢得愈好。摩迪、華維迪都表示為進入決賽而興奮。
決賽日穩守突擊
賽前全世界都睇好利物浦，但比賽時你唔會喺球員身上感覺到皇馬處於下風。利物浦壓迫同瘋狂進攻，皇馬防守滴水不漏，從容不迫，安察洛堤故意安排後防貼近門將。古圖奧斯神一般成功撲救利物浦攻勢9次。皇馬全隊高度專注打防反，只係等一兩個機會，上半場先有賓斯馬詐糊，下半場有雲尼素斯把握機會，將華維迪（稱自己係射失）嘅傳波送入龍門。最後，皇馬以一球贏得今屆歐聯決賽冠軍。 其實，兩隊心理質素都好強。
最後送個小tips 畀大家。其實日常生活中都可以提升自己心理質素。當我哋緊張時，85%嘅人都會叫自己冷靜，但如果無冷靜開嘅人點幫自己好？
哈佛商學院嘅研究指，原來就算簡單同自己講一句（自我對話），「我好興奮（I am excited）」，都會比無同自己講嘅人提升到17至22%嘅表現。因為緊張同興奮都係高漲喚醒情緒（high arousal emotions），比較容易轉移。下次緊張時，不妨試下。
今季好多謝大家睇我寫嘅文章，希望下季有機會再同大家分享。
另外，6月11號，皇家馬德里香港官方球迷會會舉辦「歐聯冠軍皇家馬德里捐血應援活動」，捐血之餘仲可以慶祝皇馬第14次奪歐聯冠軍，現場可以同大耳盃打卡，大家唔好錯過！多多支持呢個咁有意義嘅活動。
歐聯冠軍皇家馬德里捐血應援活動詳情：
https://www.facebook.com/181084505744094/posts/1437119646807234/?d=n
相關文章：
【鏟草男女】皇馬逆轉心理學（二）皇者之心
https://www.sports.now.com/home/news/details?id=36222927080
【鏟草男女】皇馬逆轉心理學（一）
https://sports.now.com/home/news/details?id=36133178367
撰文：June
旅皇迷一名。喜歡旅行，喜歡足球；享受在場邊搖旗吶喊，經歷足球的喜怒哀樂。
歡迎瀏覽球十三fb專頁若得到波友一個like就是我們團隊的一大鼓舞：
www.facebook.com/ballthirteen