獻給堅持下來的你。
(©AFP)
【Now Sports】寫稿佬嘅卑微，有時候可以化為一種力量，讓求生意志升級再進化，像壞孩子迪比一樣。
最後一場分組賽，雲拿當（Georginio Wijnaldum）梅開二度，壞孩子迪比（Memphis Depay ）攻入1球，荷蘭大勝北馬其頓3:0，全勝殺入16強。畢竟，兩隊實力差距明顯，場波就唔使講太多，今日想講一個人。
迪比係一個缺乏安全感嘅小孩，3歲就唔見咗加納老竇，老母亦在2002年改嫁鄰居，自小就飽受欺凌，除了膚色，還因為家庭背景。「我哋通常打拳頭架，但都試過幾次面對對方用刀威嚇我。」最嚴重一次係，佢俾人用鉗子夾住耳朵，再出力係咁拉，如古代十大酷刑，大人細佬切勿模仿。
佢曾經對生命中嘅「痛」感到麻木，在學校上堂時總是躲在枱底，完全對人失去信任，但足球救咗佢，將佢喚醒。外公係體操同跳遠高手，迪比以前都有玩體操，更在4歲時對外公講：「有朝一日，我會效力巴塞。」今日夢想成真，不惜減薪都要過檔。
橙衣軍團星味今非昔比，三劍俠之後，有伯金、雲達沙，然後再有尹佩斯、洛賓、史奈達，然後就沒有然後。迪比在只有8700名居民嘅農村長大，人生首個伯樂是與伯金同期嘅高古，2014年世界盃獲雲高爾徵召入國家隊。轉投曼聯後，人人以為佢嘅職業生涯會似前輩般一帆風順，事業剛好相反，或者就係上天畀佢嘅考驗。
呢幾日唔少人寢食難安，肯堅持、願堅持，已經贏了自己，人生就係充滿考驗之旅，共勉之。
撰文：八十後鬱金香
鍾意食橙，喜歡橙色，命中註定