【Now Sports】難得睇見愛隊嘅後備球員,出二線兵贏威爾斯,板凳深度唔錯,好現象。
作為強隊,通常一個大賽只有兩個機會能夠睇見大量後備兵落場,一係就係分組賽篤定晉級而踢最後一場,一係就係季軍爭奪戰,兩個情況都代表隊波喺賽事有唔錯表現。意大利今屆就有呢個機會,睇見比洛堤、費達歷高基艾沙,以至入波嘅比仙拿都好賣力,梗係啦,機會隨時可一不可再。
今日落場嘅,小基艾沙突破能力唔差,而比洛堤本來就係介乎正選後備之間,嚟緊應該仲有機會落場。名氣大又資深嘅華拉迪終於登場,擺到明未上力,但係台型十足,我係文仙尼,都好難從佢同文奴亞盧卡迪利之間取捨。
難得見到著1號波衫嘅後備龍門沙列古(Salvatore Sirigu,以前跟譯名叫沙利古,諧音犀利古),佢生於前有保方,後有當拿隆馬嘅年代,幾犀利都冇用。今場喺完場前都叫落吓場,延續近3屆意大利有份踢嘅大賽(2014年世界盃、2016年歐國盃、2021年歐國盃),都體驗到分組賽落場滋味,聊勝於無。
最開心係主力得到喘氣機會,代隊長邦奴治踢半場就退下火線,養精蓄銳等住踢烏克蘭或者奧地利。
最最開心係發生走漏加利夫巴爾一次,差啲俾人追和,係一個警號,淘汰賽唔好再犯啦。
撰文:Malena(燕飛)
現在我老了,人家才說「你很好」。