【Now Sports】葡萄牙大勝匈牙利3:0,好多人覺得比數反映唔到真實情況,因為第1個入球於84分鐘先至出現。其實係費蘭度山度士下半場換人到位,成功為葡萄牙拎到3分。
開波時,匈牙利縮得好後又密集,葡萄牙有攻擊但唔奏效,而對手逼搶同樣硬淨,可以見到雙方球員都撞到成個飛起!上半場葡萄牙嘅迪奧高祖達有幾次轉身喺邊線攻上前都好靚,但佢踢法比較上腳,喜歡hold波同自己嘗試射,浪費咗幾次機會。可能佢緊張得滯,如果抬頭望望隊友可能更好。基斯坦奴朗拿隻臨完場時6碼門前失機,結果上半場先打個和。
下半場匈牙利都有幾個入肉攻勢,相反葡萄牙好似無咩特別攻勢。一直到71分鐘,山度士作出第一個變動,就係換走賓拿度施華,換入哈化施華,佢開始有幾下失誤俾人爆咗幾次,但之後葡萄牙贏波,同下一位換入嘅球員絕對有關。
81分鐘,山度士再作變動,換走防中威廉卡華路換入攻中軒拿圖山齊士;再換走祖達,換入攻力強嘅安達施華。明顯見到山度士知道葡萄牙再唔入波,喺死亡之組要出線就難搞……祖達換出後, 般奴費蘭廸斯墮後少少,更方便佢派牌。而今場想減少體力消耗嘅C朗,到82分鐘都忍唔住出嚟幫波。84分鐘,山齊士走位,般奴發動攻勢,哈化將個波輾轉傳到古里路腳下破網,葡萄牙領先。
87分鐘,山齊士再發動攻勢,哈化施華衝入禁區搏得12碼,C朗射入,葡萄牙領先到2:0;之後,山度士又作變動,換出般奴再換入防守中場,希望保持比數直到完場。不過,哈化喺92分再交出一助攻畀C朗,最後射成3:0 完場,C朗拎埋Star Of The Match!
山度士果斷換入哈化施華,哈化交出兩助攻,博到一球12碼;而山齊士嘅換入亦奏效,兩位絕對係葡萄牙致勝關鍵!
至於C朗梅開二度,令佢今場破咗以下歐國盃決賽周紀錄:
最多參與屆數:5次
最多入球: 11球,今場入2球
題外話:一開場見到竟然係Full house,雖然大部份都係匈牙利球迷,但有咁多球迷在場,相信球員們都會好懷念。希望之後幾場波,喺安全嘅情況下會見到更多球迷!
撰文:June
旅球迷一名。喜歡旅行,喜歡足球;享受在場邊搖旗吶喊,經歷足球的喜怒哀樂。