【我們都是這樣睇EURO】球迷會女神June現場為C朗落淚

【Now Sports】人美心善有學識、夠義氣搵親幫手永無托手踭……熟悉香港足球球迷會動向的，固然不會對June感陌生，更清楚的，是她熱愛皇家馬德里，以及基斯坦奴朗拿度。

「由細到大都一直追睇歐國盃或者世界盃，但最有印象嘅係2004年歐國盃，當年係支持英格蘭同鍾意奧雲，亦係我第一次留意基斯坦奴朗拿度。當年葡萄牙8強以12碼淘汰英格蘭（奧雲有入波但英格蘭一如以往都係輸12碼）。當時我唔知C朗係邊個，但個鏡頭成日影住佢（後來先知佢當時踢緊曼聯）。仲心諗，到底呢個樣寸寸貢嘅人係邊個？到決賽再見到葡萄牙輸俾希臘，就對呢隊波印象深刻，亦開始留意葡萄牙。」

皇家馬德里香港球迷會會長June，一口氣道出睇歐國盃嘅履歷，同埋對C朗由唔識、認知到熱愛嘅心路歷程。

本職是臨床心理學家的June，最難忘喺上屆親身赴法國，觀賞呢個歐洲最大型球賽。「歐國盃嘅難忘回憶有好多，不過一定係長大後可以親身去睇2016年賽事。當年好彩抽到決賽門票，一路睇一路擔心葡萄牙踢唔到最後，8強已經想飛去睇對波蘭，但可惜當年實習中，唔可以放咁多日假。最後都決定早啲飛去法國睇4強葡萄牙對威爾斯，落機馬上揸車5至6個鐘車去睇當日喺里昂嘅準決賽，親眼見到C朗跳到兩米6咁高頂入一球，再助攻蘭尼入波，帶領葡萄牙晉身決賽。」

「到決賽C朗受傷，其實當時好驚，成個人都覺得好震，全場都好靜咁。因為就算我坐得好近，其實都唔似睇電視咁有慢鏡同近鏡。我緊張到要問返睇緊電視嘅朋友發生咩事。」回想C朗受傷這一幕，June依然感觸不已：「後來佢兩次嘗試起身，我都知其實佢唔可以繼續。真係為佢流咗眼淚，覺得咁辛苦踢到呢度，竟然係咁樣……。」

「好彩佢嘅隊員都好堅持，我又見到佢出返嚟，企喺場邊支持球隊仲做埋教練咁，好體現到佢真係場內場外都係精神領袖，真係毋庸置疑。到加時法國其實狂攻，都令我好緊張，直到艾達入波，我見到C朗好開心嗰個樣。臨完場1分鐘，我其實都係顧住睇C朗好興奮跳嚟跳去個樣，覺得今次實習（本來身在紐約）都飛去睇好值得。」

June對C朗、葡萄牙情有獨鍾，今屆自當沒不捧場之理：「C朗等咗咁多年，今年終於有一班睇佢踢波大，又可以有力爭標嘅後生仔幫手。其實近年有留意葡萄牙青年軍嘅人都知，佢哋踢得唔錯，U19喺近幾年歐洲賽多數都喺4強內，相信佢哋都成長咗，部份變成大國腳。葡萄牙U21 剛剛都入咗U21歐洲盃決賽，只係以0:1輸咗俾德國飲恨。」

「個人願望係葡萄牙攞冠軍，相信佢哋如果擺脫到死亡F組，係可以去到好遠。另外我睇好法國同意大利，4強應該會見到佢哋。睇好法國，主要見到重返國家隊嘅賓斯馬同安巴比喺熱身賽夾得好順，而意大利以10場全勝姿態得到決賽周入場券，表現令人期待。」

工作、搞球迷會活動尚要捱夜睇波，且聽June有何妙法應付？「賽事期間都要工作，所以可能一返屋企就先瞓覺，到比賽時間先起身。捱眼瞓良方應該係睇波前沖涼同食嘢，之後個人就會醒晒。」

疫情令不少原本計劃現場睇波的球迷卻步，June最想約大夥兒一起觀戰：「有幾位朋友本來約咗一齊去現場睇決賽，但最後都退咗票，希望有機會約佢哋一齊睇；另外就係想同我嘅葡萄牙buddies睇返場葡萄牙比賽。」

最後她透露對賽事的期望：「剛剛收到西班牙隊長巴斯基斯確診嘅消息，依家成隊要隔離。希望歐國盃2020唔會受疫情影響，球員觀眾都健康，比賽順利完成。」

【編按：June在決賽周期間，將會為本網站專欄《熱血球迷》撰稿，敬希捧場。】

【下次預告：外號高佬權、牛咁眼的資深演員陳國權認為嘆普洱、咖啡乃捱夜睇波必備。】

【我們都是這樣睇EURO】陳肇鈞：獨自睇更集中

https://sports.now.com/revamp/euro2020/web/news_detail.jsp?id=33617724965

【我們都是這樣睇EURO】福音漫畫家繼續「葡」

https://sports.now.com/home/news/details?id=33483629526

【我們都是這樣睇EURO】「C朗女」最想同193姜濤睇波

https://sports.now.com/home/news/details?id=33575355150