【Now Sports】周健宏是首個登陸韓國籃球聯賽的香港球員,又將韓國味道帶來香港開設韓式咖啡店,與韓國文化有著不可分割關係,但原來他小時候試過不敢承認自己是半個韓國人。
採訪:肉面飛龍
【唔敢認係韓國仔,變為推廣韓國產品到香港】
「韓國文化對我影響有幾深?最深遠嘅地方就係由小學生嘅時候,我知道我係半個韓國人,我唔敢同人講,因為覺得好瘀,嗰陣時香港人好型,嗰陣時講緊有四大天王。」周健宏說,「到而家個轉變開始發達,韓國嘅國力開始好,潮流又有G-Dragon、韓劇《來自星星的你》,我認為好嘅產品係應該要比更加多人知道,而唔係收埋。」
自己始終在韓國出世,夢想回到韓國做職業球員,開第一間鋪頭,也自不然以韓風為主,咖啡店內原材料均由韓國進口,讓人感受到真正的韓國味道。店裡最受歡迎的產品Dirty Coffee和Spam Box,都是周健宏的心血結晶。
對於Spam Box成為招牌菜,他亦十分自豪,因為這是他與員工一起構思,「每一個食韓國嘢嘅人,都離唔開三樣嘢,就係泡菜、人蔘雞、部隊鍋,但部隊鍋我哋嗰陣仲未有咁成熟嘅技術,買咗罐午餐肉返嚟就話不如炸咗佢,又OK喎,但又冇理由一個午餐肉就咁拎出去會好核突,不如試下攞啲嘢載住佢,咁就攞返個罐載住佢,又真係OK影相又靚,菠蘿炒飯你都係因為個菠蘿嘅啫,你唔係因為菠蘿炒飯入面個炒飯而叫。」
【在韓國和香港打波分別?】
被問到韓國和香港打波有何分別,周健宏表示雖然可能有人會不喜歡聽這些說話,香港做籃球員不需要承受那樣大的壓力,那就是職業和業餘的分別,「韓國灌輸比佢哋嘅球員,職業係有一個professional嘅精神,你要預咗被人鬧,你做得好係應該,唔係bonus,佢哋係一個professional嘅精神。」
「佢哋第一次教我嘅嘢就係,你唔好覺得自己打波勁觀眾就鍾意你,係如果你冇觀眾嘅話,你幾勁都冇用。你要知道觀眾肯畀錢睇你打波,呢個先係最重要。香港我唔知有冇人咁講過,但係我喺香港10年都冇聽過有啲人會咁講,亦都係好現實嘅一樣嘢。」
【疫情下的雙重影響】
疫情之下飲食業首當其衝,而運動界亦受到嚴重打擊,既是生意人,又是籃球員,周健宏可謂受到雙重影響,不過正如德國哲學家尼采所言,What doesn’t kill you makes you stronger,周健宏亦有類似想法,「我覺得過咗2020年,個心態係會改變咗,好多人都話2020年咁都唔死,其實已經好好彩,但我覺得只會更差,可能會變咗其他嘢出嚟,但係我哋克服咗呢個關口,我哋捱過咗2020年,可唔可以攞返咁嘅心態去做其他嘢,我覺得會成功嘅。」