【Now Sports】等了又等，籃球場將於周五（19日）重開！籃球愛好者可以落場打波當然高興，不過相隔差不多3個月復操就要格外留神，小心身體不勝負荷受傷。兩個不同年代的甲一籃球員周健宏及梁振雄（Coach Fui）也曾因打籃球受傷，兩個過來人決定合作「軟硬兼施」，前者私心推介韓國品牌復健，後者研究獨門練習方法，希望有助當打球員減少受傷機會，受過傷的不再重蹈覆轍受傷。（影片附上Coach Fui教學）
採訪：肉面飛龍
周健宏3年前在韓國職業聯賽算是最多機會、最有表現的一季，當他準備初嘗於韓職正式上陣時，卻在開季前一天受傷，經診斷後證實臏骨斷裂，球季報銷。談到當時感受，阿宏坦言「世界好似完咗咁」。但現在回想起來，又覺得學到了很多，尤其是對運動有另一種睇法。
阿宏：以前細個唔會明，好似我睇阿灰（梁振雄）打波咁，佢整親嗰場係喺永倫，佢臨尾入咗兩球3分，臨尾第4節時我睇住佢整親，其實嗰陣時係唔會明，冇受傷嘅人係唔會明嗰種心情。
阿宏：以前係諗點樣打得好啲，跳得高啲，點樣叻啲；而家就調返轉，唔好受傷，一個好平穩嘅數據，喺個球場上留返住自己先，呢個係兩個好唔同嘅睇法。
正如周健宏所說，阿灰在球員年代受傷，當談到受傷後的慘況，他笑言啪的一聲不只聽到是腳斷了，而是聽到整個人生都斷掉了。
阿灰：我哋嗰個年代球隊老闆幫你畀咗醫藥費，做咗修補手術，但係嗰陣時生活拮据，攞住支拐杖要出去教波，身上面得10蚊，喺九龍塘等朋友來接濟我。受傷之後你要痛3個月，復健要1年，其實我係好唔建議大家要運動而受傷。
阿灰：籃球一路都轉變緊，點解呢10年咁多人斷十字韌帶，你睇NBA都係，因為多咗快攻，打小球、打3分、打側切步、打急停，你嘅損耗就大咗。
阿灰表示，香港有很多不同組織舉辦的籃球聯賽，打籃球有90%的人都是業餘性質，最容易受傷的人，並不是職業球員，反而正正是業餘的人，他們受傷之後，生計和生活亦受到影響，所以阿灰希望教導大眾，如何練到技巧之餘，又避免受傷。
阿灰：依家啲小朋友5歲就開始打籃球，佢哋去到8歲就已經膝頭哥痛，其實係幾恐怖嘅一件事。記住我哋嘅膝頭哥全部都係用咁多年嘅，每個人都係用廿零年到，你由5歲開始就磨蝕，咁你到25歲個膝頭哥就老化得好緊要，所以我認為訓練教大家如何使用真正嘅核心力量去保護自己，係我而家接下來嘅人生目標。
周健宏表示在復康過程中，聽得最多人問候他的說話是「你仲驚唔驚」、「有冇陰影」，的確受傷過的人陰影面積有多大，只有他們才明白，要克服這個陰影，首先再有足夠的保護。
阿宏：上季我要落返場打波，試過好多方法，其實開頭真係驚，咁我就不斷搵唔同嘅產品，咁我大大話話試咗50個品牌以上，有日本、韓國、大陸、台灣、香港自家製、美國、德國，所有唔同產品護膝我都試過，其實好正常，因為你真係好驚再整親，咁我就試咗一個牌子，我打波唔著佢我係唔夠膽打波。
阿宏親身試過最適合他的護膝，他本著「好嘢要分享」的心態，希望推介韓國牌子4WIN給大眾，於是他決定代理這個品牌。
阿宏：我覺得呢個係一個硬件，可能會幫咗你嘅信心，減低損耗，佢係會幫你換機油，係一個保養，講到最尾都係一個訓練上嘅嘢。
阿宏希望用這個產品幫到人，加上阿灰的訓練課程雙管齊下。
阿宏：我哋呢個品牌係膝頭哥關節嘅品牌，佢又整親過我又整親過，其實我哋知道大眾係需要啲乜嘢，咁我就同佢講我哋不如合作做一啲訓練班。
阿灰：今年疫情喺屋企好多時間思考，就思考左一整套係屬於我哋亞洲人點樣用核心力打波防止受傷，儘管我去打波有好多急停嘅動作，好多跑步嘅動作，好多轉向嘅動作，我右膝冇做修補手術，冇韌帶都照樣做晒啲動作出嚟。
阿灰亦在影片後段親身示範和教授如何練習核心力量，如果大家準備好復操，不妨試著跟他練習。