【Now Sports】香港時間星期一上演第55屆NFL美式足球超級碗Super Bowl，坦帕灣海盜以31:9大勝上季冠軍堪薩斯酋長，最矚目應該係43歲嘅四分衛湯巴迪第10次打入超級碗決賽而第7次勝出，第5次成為Super Bowl MVP。因為最強嘅NFL球隊只係勝出過6次超級碗，分別係匹茲堡鋼鐵者及新英倫愛國者，所以巴迪 喺NFL史上絕對前無古人，應該都算係美式足球球王。網路上亦探討球迷跟巴迪轉會問題，球迷轉會係咪代表佢係假球迷？
撰文：步大力熊
筆者曾於New England 一帶讀中學，當地電視台會優先播當地NFL球隊比賽，以前網絡唔發達未必可以睇到其他隊嘅比賽，所以新英倫愛國者（New England Patriots） 變成筆者愛隊 。當時2002年湯巴迪（Tom Brady）以新人姿態為愛國者4季奪3冠，然後2015年至佢離開前隔年就奪一冠。上年，巴迪宣佈離開而唔係喺效力長達19年嘅愛國者退休，老實講，係令好多球迷失望。
好多美國人都會覺得，佢搬去佛羅里達州都係諗住退休，因為坦帕灣海盜係一隊平凡嘅球隊，巴迪當時雖然已經42歲，但應該有更好選擇，所以一般認為佢選擇去佛羅里達州，應該都係想輕鬆終結球員生涯。依家睇返轉頭，明顯巴迪唔係諗住去退休，特別當知道佢邀請退休舊拍檔哥禾斯基去踢波。連舊日愛國者拍檔都跟巴迪轉會，球迷想轉其實不難理解。
球迷睇住巴迪再入決賽，心情係非常複雜，但心裡說不，身體卻很誠實。第55屆超級盃當晚，新英倫一帶嘅收視率比坦帕灣一帶更高，而且當晚收視率比愛國者大部份歷屆超級碗收視率更高。可見球迷對今次關注度非常熱切！令波士頓電台主持人Fred Toucher 質疑，係唔係巴迪年代睇波嘅球迷，都跟佢一齊轉咗會。
到底球迷跟球員轉會係咪一個問題？2018年基斯坦奴朗拿度由皇家馬德里轉會祖雲達斯，一樣引起球迷嘅討論，而今次美式足球球王轉會，球迷又咩反應？
網路上可以見到有愛國者球迷一早買好海盜嘅波衫，亦有一班唔睇好嘅球迷話會支持另一隊，希望巴迪唔可以勝出。筆者應該係第3種球迷，有Brady嘅Patriots由細睇到大，感情深厚，有幾屆超級碗決賽都好難忘。雖然無轉會，但都希望Brady去到另一支球隊仍然可以成功。因為好球員真係踢一場少一場。
好多人喺比賽前問，呢場會唔會係Brady 最後一場NFL，但睇完第55屆超級碗，筆者真心欣賞海盜嘅團隊，進攻有Brady同 Gronkowski就唔使講，但特別係防守方面真係好出色，進攻時非常保護到四分衛，防禦時強勢，更令對手常常犯錯。Brady 已經放聲話會再踢一季，到時可能會有新一輪嘅球迷移民潮。
撰文：步大力熊
要做一個理性球迷？不了，成為球迷本身就是一件不理性而且瘋狂的事。
email：ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞：
www.facebook.com/ballthirteen
