【Now Sports】空手道情侶鄭子文和曾綺婷今年1月結婚「升呢」空手道夫妻,婚後首個情人節,兩人合製情人節花束,繼續甜甜蜜蜜。
採訪:肉面飛龍
【限聚令下的婚禮有笑有淚】
子文和綺婷拍拖7年,終於在今年1月於限聚令下完成婚禮,能夠順利在疫情下完成婚禮,綺婷坦言已心滿意足,而子文不忘感謝家人支持和遷就,令到婚禮順利舉行。談到婚禮當日,綺婷說,「我都冇expect自己會喊,可能感動亦好感觸,其實係開心嘅喊。」她又指著子文說,「我以為佢會喊,點知連喊都冇喊。我心諗,哎呀,點解會睇唔到你喊。」
子文十分得戚,以勝利者姿態說,「我哋本身喺結婚之前估邊一個會喊,但係好成功我冇喊到,因為其實我覺得結婚嗰日成個氣氛好緊湊之餘,其實都好開心,同屋企人朋友表達我想講嘅嘢嘅時候,我都覺得係一件好開心嘅事,冇乜話特別太過感觸要流眼淚。」
【換個身份的相處】
新婚生活過了一個月,兩人不時在社交網站分享他們的日常,子文表示綺婷是家中「大廚」,而自己就負責洗衫。有時子文想起在日本訓練時的食物,綺婷亦能煮出一些簡單的日本料理,讓他重拾當時感覺。
談到新婚生活,綺婷笑笑口說,「我對老公好滿意,我對我哋嘅新婚生活好滿意。」子文忍不住插嘴,「唔係唔滿意呀?」綺婷說,「我諗叫做另一個階段,同之前拍拖唔同身份,除咗我哋兩個之外,可能雙方嘅家人都要照顧埋,我覺得係應該同埋都係開心嘅,呢一樣嘢係大家都成長。」
【生B計劃:一人教一個鬥過】
雖然目前兩人焦點放在爭取奧運上,但除了奧運,也會計劃一下空手道以外的人生。問到奧運後的打算,綺婷想了一想再說,「奧運完咗就打算……休息,哈哈。其實都會計劃下將來,可能睇下運動員生涯自己仲想走幾遠,始終自己都玩咗空手道頗長嘅時間,20幾年,都想轉換一下身份,可能組織下家庭,或者可能有小朋友。」
子文亦在旁附和說,「我都係跟我太太嘅方向,如果佢都想打多幾年,我都好支持佢,生仔我哋再從長計議,我哋都想嘅,我哋都好鍾意小朋友。」綺婷興奮地說出生仔大計,「我哋要有小朋友出去比賽,我嘅小朋友要贏佢嘅小朋友,可能生兩個,有一個打搏擊,另一個就打套拳,但我哋首先會爭邊個教邊個先,哈哈。」子文笑言擔心會發生家暴。
【送走特別又充實的鼠年】
回顧鼠年,子文形容是頗特別的一年,因為疫情他在日本逗留了半年,從而學到了很多,因為以往海外訓練大概都是一兩個星期就會完,效果未必太顯著。
子文說,「今次留咗喺日本半年,學咗嘢之餘又可以即刻實踐,再即刻反覆訓練,喺一個咁好嘅訓練環境底下,自己技術水平好咗好多。另外一個層面就係可以接觸好多高水平運動員,呢段時間同佢地有好深入嘅交流,平時淨係可以喺比賽見到佢哋,覺得佢哋好犀利好勁,但係其實佢哋平常嘅生活諗緊啲乜嘢,心態係點樣去準備每一日嘅訓練,呢啲嘢都感染咗自己。」
對於綺婷當然也是特別的一年,雖然去年不幸受感染新冠肺炎,但積極開朗的她,也覺得不是一件壞事,因為她感受到身邊很多人的關心,「我覺得鼠年都過得幾快,雖然好似冇乜嘢做過,比賽又少咗。但呢一年都係好充實咁過,雖然要戴住個口罩,但我覺得每一年都會有一啲唔同嘅事,可能今年又有其他變化,亦都有其他難忘嘅事。」
子文補充,「我哋成日都講空手道係一個人生,無論有好多唔同嘅挑戰或者挫折,最後都要克服佢。我覺得上年大家都經歷咗好多波折,最後都一定要有信心去克服困難,所有嘢可能今日睇返其實都好充實。」
【牛年目標:牽手爭取奧運】
接下來這對空手道夫婦將手牽手爭取可能是他們唯一的奧運,子文說出他們的部署,「近呢半年我哋啲比賽都取消晒,依家下一個教練set嘅目標就係4月嘅比賽,我哋希望到時疫情好返啲嘅時候,就會去參加比賽,跟住就到6月東京奧運嘅資格賽,叫一個最後機會去爭取奧運入場券。」
子文補充,「最大嘅目標就係想爭取入場券,因為奧運喺我哋空手道項目叫做得一次機會,因為喺東京主辦國有空手道呢個項目,作為空手道運動員,打咗咁多年,真係得一次機會,希望運動員生涯可以達成到呢個目標。」
綺婷亦說,「我同子文一樣,唯一可能亦都係最後一次奧運,希望自己能夠參加、參與到,盡力而為,希望奧運可以我哋兩個人一齊去。」