耶穌仔控得靚後射入。
(©AFP)
【Now Sports】曼城於周六英足盃第4圈差點被爆出冷門，於尾段連轟3球，作客反勝英乙車頓咸3:1。
對比上場英超的正選陣容，曼城鬥車頓咸作出了10個調動，只有中場霍頓繼續擔正，加比爾捷西斯（Gabriel Jesus）、馬列斯、費蘭托利斯組成鋒線。
藍月在上半場有8次攻門，但無一能夠轉化成入球。捷西斯在52分鐘接應霍頓妙傳，面對門將格菲斯竟射斜。車頓咸大難不死，於59分鐘創造一次界外球攻勢，前鋒萊特近柱二傳，拍檔美爾射成1:0。
藍月立即大舉反撲，在81分鐘由霍頓接應傳中射入，追成平手。不足3分鐘後，中場費蘭甸奴交出過頭波，多次浪費機會的耶穌仔終有建樹，控得靚後射入，一下子反超前。費蘭托利斯於補時埋齋，藍月驚險地反勝3:1過關。
至於另外3支英超球隊，韋斯咸主場向英甲唐卡士打派出4蛋，錫菲聯以2:1力克到訪的英甲普利茅夫，白禮頓主場擊敗英甲黑池2:1。