約域終離開皇馬。
(©AFP)
【Now Sports】近日約域一直被傳會借回法蘭克福，而施丹剛剛前一日喺記者會先講：「約域仲同我哋一齊，佢哋冇話我知（佢將會被借走）。」
撰文：步大力熊
結果唔夠一日，剛剛香港時間星期四晚，皇馬就官方宣佈約域（Luka Jovic）會被借回法蘭克福至季尾。未有購入條款，仲傳皇馬會畀8成人工。或者高層都覺得仍然施丹唔用，慳到兩成人工，加上畀約域踢番起，都唔係壞事，但就算高層有想法，亦好難令球迷相信施丹一日前會唔知情……
當然約域嚟咗皇馬傷病比較多，而且紀律有少少問題，如違反防疫或隔離令俾塞爾維亞政府告，喺屋企隔離期間，佢被傳貪玩喺自己屋企露台跳落地整傷自己。
所以，施丹噚日除咗話自己唔知約域會被借回之外，都有話約域有好多嘢需要學習，而呢樣係佢要做嘅事。係咪有玄機？
有趣係，呢個絕對唔係施丹第一次畀呢類型嘅官方答案，例如上季施丹都一直話加利夫巴爾同占士洛廸古斯係好球員或球隊重要一員，但結果兩位坐咗成季落場時間，10隻手指都數得晒……
睇得多，球迷都開始了解施丹有一系列喺記者會嘅官腔。施丹講得太玄，有時講完同冇講差唔多，唯有唔好太認真解讀。
撰文：步大力熊
要做一個理性球迷？不了，成為球迷本身就是一件不理性而且瘋狂的事。
email：ballthirteen@hotmail.com
歡迎瀏覽球十三fb專頁若得到波友一個like就是我們團隊的一大鼓舞：
www.facebook.com/ballthirteen